Sveçla në Slloveni flet për sulmet terroriste të Serbisë në Kosovë

Ministri i Punëve të Brendshme, Xhelal Sveçla, që në Slloveni po qëndron me ftesë të homologut të tij, Boshtjan Poklukar, në forumin e ministrave të brendshëm në kuadër të procesit të BRDO-s.

Në adresimin e tij në këtë forum, ku të pranishëm ishin edhe Komisionerja e për Zgjerim, Marta Kos, dhe Komisioneri për Punë të Brendshme dhe Migrim, Magnus Brunner, Sveçla ka numëruar sulet që Serbia ka kryer në Kosovë, përfshirë edhe sulmin terrorist të Banjskës që tha se kryerësit e krimit ende ndodhen në arrati.

“Theksova se sulmi terrorist në Banjskë më 24 shtator 2023 vazhdon të mbetet një çështje e pazgjidhur, me kryesit e krimit ende të arratisur. Po ashtu, vura në pah se vetëm në gjysmën e fundit të vitit 2024, në Kosovë kanë ndodhur 11 sulme që përfshijnë përdorimin e pajisjeve shpërthyese, përfshirë sulmet ndaj Stacionit të Policisë në Zveçan dhe ndërtesës së Komunës, si dhe ndaj kanalit të ujit Ibër – Lepenc në Zubin Potok, i cili furnizon Kosovën me 60 për qind të ujit të pijshëm”, ka treguar Sveçla.

Gjatë forumit janë diskutuar rreziqet reale të kohës, terrorizmi dhe trafikimi me qenie njerëzore, lufta ndaj të cilave, sipas Sveçlës kërkon intensifikim të bashkëpunimit me qëllim të luftimit efikas të tyre.

Sveçla tha se Kosova mbetet storie suksesi edhe në luftimin e formave të tjera të terrorizmit ndërsa në aspektin strategjik vazhdojnë të kenë në fokus komponentën e parandalimit.

“Në kuadër të luftës ndaj trafikimit të qenieve njerëzore, theksova rëndësinë e bashkëpunimit mes institucioneve tona si mekanizmi kryesor në goditjen e rrjeteve kriminale që zhvillojnë këtë aktivitet dhe sjelljen e tyre para drejtësisë si dhe mbrojtjen efikase të viktimave”, tha ai.

Ministri kosovar ka thënë se Kosova mbetet aktive dhe e gatshme për bashkëpunim me qëllim të luftimit të çdo ilegaliteti që cenon sigurinë, paqen dhe stabilitetin. /Telegrafi/