Superliga rikthehet në aksion, Arbëria nikoqir i liderit

Elita e futbollit kosovar rikthehet në aksion pas një pushimi prej 10 ditës për shkak të ndeshjeve të Kombëtareve.

Xhiroja e gjashtë në Superligën e Kosovës në futboll starton sot (e premte) me fillim nga ora 14:00, derisa takohen Arbëria dhe Ballkani.

Ballkani udhëton drejt Obiliqit për të kërkuar vazhdimësinë e rezultateve pozitive dhe njëherit të vazhdojë të qëndrojë në kreun e tabelës, ndërkohë Arbëria synon t’u kthehet rezultateve pozitive, pasi që u njoftua me humbje në xhiron e kaluar nga Gjilani.

Takimi do të zhvillohet në stadiumin “Agron Rama” në Obiliq dhe pritet të jetë tejet interesant, marrë parasysh që dy skuadrat kanë treguar ndeshje të bukura në këtë fillim kampionati dhe me të drejtë gjenden edhe në pjesën e epërme të klasifikimit.

Përballja ndërmjet këtyre dy skuadrave do të jetë e para në kampionatin elitar, por e nënta në përgjithësi, pasi që edhe në të kaluarën ishin përballur në rangjet e tjera të futbollit kosovar.

Gramos Shala do të jetë gjyqtar kryesor i kësaj ndeshje, teksa ndihmësit e tij janë Gzim Mehmeti dhe Elvis Bicaj. /Telegrafi/