Super Ferizaj – pesë ndeshje, pesë fitore për pozitë e pestë në IPKO Superligë

Ferizaj po zhvillon një pranverë, lirisht mund të themi të çmendur, pasi ecuria e tyre është e atyre që i përket një kampioni.

Në pesë ndeshjet e fundit, të besuarit e Bylbyl Sokolit, kanë marr pesë fitore, duke kaluar në pozitën e pestë.

Këto 15 pikë i kanë dhënë frymëmarrje të lirshme Ferizajt, që tani ka 40 pikë.

Klubi ka arritur të reagojë me trajnerin Sokoli, pasi nën drejtimin e Afrim Tovërlanit, fitoret ishin të rralla.

Sokoli: Kemi ende punë

Trajneri, Bylbyl Sokoli, është shprehur i kënaqur me fitoren dhe me atë që treguan futbollistët e tij.

“Na nevojiten edhe tri pikë. Qëllimi ynë ka qenë barazhi, e kemi arritur atë qëllim. Tani do të mundohemi t’i ikim edhe barazhit. Është për çdo kritikë fakti që nuk shfrytëzuam disa raste shumë të mira”.

“Megjithatë, më të merituarit për këtë fitore dhe për këtë bilanc në pesë javët e fundit janë futbollistët”, ka thënë Sokoli për Super Sport Kosova.

“Kjo fitore është edhe më e madhe, duke marrë parasysh se patëm shumë mungesa. Sidoqoftë, kjo skuadër ka treguar karakter të fortë”, ka shtuar Sokoli.

Edhe dy ndeshje

Për ta siguruar mbijetesën plotësisht, Ferizajt i duhet ta fitojë edhe njërën nga dy ndeshjet e fundit.

Në mesjavë janë mysafirë i KEK-ut, ku pikërisht në këtë ndeshje mund të sigurohet mbijetesa në Superligë.

Në javën e fundit Ferizaj do të jetë nikoqirë i Gjilanit, që pothuajse ka mbetur në barazh. /Telegrafi/