Sulmi ndaj Radeskit jashtë stadiumit – Struga mohon përfshirjen e Shkëndijës apo tifozëve tetovarë

Pas përfundimit të ndeshjes së parë gjysmëfinale të Kupës së Maqedonisë mes Shkëndijës dhe Struga Trim & Lum, një incident i pakëndshëm ndodhi jashtë stadiumit në Tetovë, ku u përfshi futbollisti i Strugës, Marjan Radeski, njofton Telegrafi.

Nga FC Struga kanë dalë me një sqarim duke e konfirmuar sulmin që i ka ndodhur futbollistit të tyre, por në të njejtën kohë kanë thënë se nuk ka të bëjë aspak me klubin e futbollit Shkëndija apo me tifozët e tyre.

“Sqarojmë opinionin publik se incidenti i shkaktuar sot ndaj lojtarit tonë Marjan Radeski pas ndeshjes kundër Shkëndijës, edhe pas sqarimit të vetë lojtarit në organet e rendit, nuk ka lidhje aspak me futbollin në përgjithësi apo aq më pak me KF Shkëndija e Tetovës, e as me tifozërinë.

Gjejmë rastin të falënderojmë ekipin pritës, që si gjithmonë kujdeset për mikpritjen e klubit, kryesisë dhe tifozërisë tonë. Gjithashtu, bëjmë thirrje edhe për #mediat të kenë përgjegjësi shtesë në të gjitha lajmet ku preket integriteti i secilit pa u konfirmuar mirë burimi i informacionit”, kanë thënë nga FC Struga.

Kujtojmë se ndeshja e parë gjysmëfinale u luajt në Tetovë pa praninë e tifozëve, ku skuadra e FC Struga Trim Lum e fitoi përballjen e parë me rezultat 1-2. /Telegrafi/