Strehimorja për qentë endacak ende larg ndërtimit në Pollog

Strehimorja rajonale për qentë endacak do të duhet të ndërtohet në territorin e komunës së Vrapçishtit. Por, se kur do të ndërtohet, nuk ka një afat të caktuar. Fillimisht duhet që të kalojë plani urbanistik dhe më pas të kërkohen mjete për financimin e strehimores. Kryetari i komunës së Tetovës Bilall Kasami, thotë se tërë procedura mund të zgjasë një vit.

“Procedura do të zgjasë pak më shumë sepse bëhet fjalë për planifikim urban, duhet të planifikohet plani i ri urbanistik dhe kjo procedurë mund të zgjasë, pra në rastin më të mirë deri në një vit, që pastaj të shkojmë me projekt themelor dhe më pastaj sigurim të financimit. Sa i përket komunës së Tetovës, kontrata me shoqatën “Amos” skadon në fund të vitit, kurse për vitin e ardhshëm nuk dihet se si do të bëhe largimi I qenve endacak në Tetovë. “Jemi në fazën e përmbylljes së kontratës që edhe ata të bëjnë aksionet e radhës, që në kuadër të marrëveshjes të bëjnë edhe grumbullimin e 80 qenve endacak dhe duhet ta përmbyllin si kontratë”, shprehet Kasami.

Kryetari i komunës së Gostivarit Arben Taravari, thotë se në komunën që drejton ai ka dy qendra për trajtimin e qenve endacak. Mirëpo, sipas tij, ajo është treguar se nuk mund të përmbahet, ngase ka qytetarë që shkojnë dhe lëshojnë qentë endacak kurse komuna nuk ka kapacitet që të ketë mbikqyrje 24 orësh.

Prandaj, edhe Taravari mendon se ideja më e mirë është strehimorja rajonale për qentë endacak.

“Kjo iniciativë është që para dy vjetëve, por për shkak të ndryshimit të pushtetit vitin e kaluar bisedohej që të ndërtohej në komunën e Bërvenicës. Tash, kryetari i komunës së Bërvenicës, nuk e pranonte atë, sipas atij, për shkak të ankesës së qytetarëve nga ajo komunë. Tash është gjetur një lokacion i ri, bëhet fjalë për komunën e Vrapçishtit. Janë duke ecur procedurat formale që duhet ti kalojmë dhe besojmë se vitin e ardhshëm mund të mendojmë për projekt konkret, i cili do të realizohet në 2023 2024 këtë nuk e di por kjo është zgjidhje e vetme për qent endacak në rajonin e Pollogut”, deklaroi kryetari i komunës së Gostivarit Arben Taravari.

Taravari tashmë do të jetë në krye të rajonit planor të Pollogut, ndërsa nënvizon se nuk përjashtohet mundësia që i njëjti projekt që ishte paraparë për komunën e Bërvenicës të adaptohet për komunën e Vrapçishtit dhe të gjenden mënyrat e financimit. (koha.mk)