Stojanoviq: Zajednica nuk është projekt kundër shqiptarëve

Zëvendëskryeministri i Kosovës nga radhët e Listës Serbe, Branimir Stojanoviq, ka thënë se serbët e Kosovës janë të rrezikuar, e sidomos ata në anën jugore të Ibrit.

Sipas tij, Lista Serbe nuk do të kthehet në institucionet e Kosovës pa fillimin e realizimit të marrëveshjeve.

Në një intervistë dhënë për “Deutsche Welle”, Stojanoviq ka folur edhe për themelimin e Asociacionit të Komunave me shumicë serbe që, sipas tij, “nuk është projekt kundër shqiptarëve”.

“Nuk është bërë asgjë dhe ky është esencialisht problemi më i madh. Përveç deklaratave dhe pohimeve në publik se duhet të formohet, në aspektin teknik nuk kemi lëvizur shumë përpara. Ne, si bashkësi etnike, si popull, jemi të gatshëm për një autonomi lokale. Ky proces duhet të çlirohet nga ngërçi dhe të lëvizë përpara, pavarësisht keqpërdorimeve të shumta të partive politike shqiptare me këtë proces, sepse Asociacioni paraqitet si projekti më i madh armiqësor ndaj shqiptarëve – që nuk është e vërtetë. Është një mekanizëm që serbët në Kosovë të mbijetojnë”, thotë ai.