Spanja miraton planin e kursimit të energjisë elektrike

Ligjvënësit spanjollë miratuan dekretin e qeverisë për kursimin e energjisë elektrike, por nëse masa jopopullore do ta ndihmojë Spanjën të përmbushë angazhimin e saj evropian për të ulur përdorimin e gazit me 7 për qind mbetet për t’u parë.

E prezantuar më 10 gusht si pjesë e shtytjes së Bashkimit Evropian për të hequr qafe gazin rus, kursimet emergjente të energjisë ndryshojnë nga kufijtë e detyrueshëm të temperaturës për klimatizimin ose ngrohjen deri te fikja e dritave në ndërtesat publike dhe vitrinat e dyqaneve. Më shumë masa ka të ngjarë të njoftohen në muajin shtator.

Lexo po ashtu Gjermania me masa drastike për kursimin e energjisë elektrike: Nga kufizimi i ngrohjes deri tek ndriçimi publik

Parlamenti, ku koalicionit të majtë në pushtet i mungon një shumicë pune dhe duhet të mbështetet te partitë më të vogla rajonale për të miratuar legjislacionin, e mbështeti dekretin me 187-161 vota – një diferencë e konsiderueshme për këtë legjislaturë, raporton reuters.

Partitë kryesore opozitare i kanë kritikuar masat që tashmë mund të mbeten në fuqi, si të improvizuara, joefikase dhe të dëmshme për ekonominë.

Të mbrojtura nga qeveria si solidare me pjesën tjetër të Evropës, masat janë shitur me vështirësi në një vend që nuk varet nga gazi rus dhe ka vuajtur nga valët brutale të të nxehtit të verës në thatësirën më të keqe në dekada.

Masat reduktuan përdorimin e energjisë elektrike me 6 për qind gjatë javës së tyre të parë.

Por duke qenë se thatësira ka kufizuar prodhimin hidro-elektrik, termocentralet kanë djegur dy herë më shumë gaz deri më tani këtë muaj sesa një vit më parë, duke e shtyrë përdorimin e përgjithshëm të gazit në Spanjë 4 për qind më të lartë, sipas të dhënave nga operatori i rrjetit të gazit Enagas.

Lexo po ashtu Mbi 70 për qind e bar-lokaleve britanike nuk presin të mbijetojnë dimrin shkaku i shtrenjtimit të energjisë elektrike

Marcel Coderch, kreu i Shoqatës së Studimeve të Burimeve të Energjisë me bazë në Barcelonë, tha se kishte një nxitje shtesë për ndërmarrjet e energjisë për të përdorur më shumë gaz për shkak të një kufiri të veçantë në koston hyrëse të gazit dhe qymyrit të përdorur nga termocentralet.

Brukseli autorizoi skemën ekskluzivisht për Spanjën dhe Portugalinë në qershor për të frenuar rritjen e çmimeve të shitjes me pakicë të energjisë elektrike në gadishullin Iberik që ka pak ndërlidhje energjetike me pjesën tjetër të Evropës. Spanja importon shumicën e gazit të saj nga Shtetet e Bashkuara dhe Algjeria. /Telegrafi/