Sonatat e Betovenit e rikthejnë Tedi Papavramin në Tiranë

Tedi Papavrami rikthehet në Tiranë me sonatat e Betovenit (Ludwig van Beethoven). I shoqëruar nga pianisti Francois-Frederic Guy, Papavrami do të japë një koncert të veçantë në datën 3 nëntor në Qendrën Kulturore të Katedrales Ortodokse.

Sipas drejtorit artistik të këtij koncerti, violonçelistit Vlorent Xhafaj, Papavrami dhe Guy vijnë me një pjesë të zgjedhur të programit, që kanë interpretuar për vite me radhë në shumë skena botërore dhe pas publikimit të tri CD-ve me veprën e plotë të Beethoven-it për violinë dhe piano (10 Sonata).

Sipas Xhafajt, dhjetë Sonatat e Betovenit përfaqësojnë korpusin më të rëndësishëm të veprave për violinë dhe piano. Si për shumë zhanre të tjera që preku, ai vendosi standardin edhe për të gjitha kompozimet e autorëve të tjerë të shkruara për këtë formacion shumë vite më pas. Këto vepra janë bazë për interpretimin dhe për gjithçka që bën një duoviolinë e piano. Standardi i këtij gjeniu unik në të gjithë ciklin është i jashtëzakonshëm, madje shpesh prek edhe madhështinë absolute.