Sindikata e Pavarur e Hekurudhave kërcënon me grevë

Sindikata e Pavarur e Hekurudhave – Trainkos ka kërkuar nga menaxhmenti i kompanisë që deri të enjten më 17 maj të kryejë pagesën e pagave për punëtorë për muajin prill 2018, ndërsa paralajmëron mbajtjen e një proteste njëorëshe më 18 maj ku do të ndalet edhe qarkullimi i trenit Prishtinë–Pejë në shenjë pakënaqësie për vonesën e pagave.

“Ne si sindikatë, nuk kemi asnjë njoftim zyrtar në formë të shkruar nga menaxhmenti i kompanisë në lidhje me arsyen e vonesës së pagave për muajin prill, ndonëse kemi kërkuar që të marrim një njoftim zyrtar nga ana e tyre. Sindikata ka pasur mirëkuptim për vonesë të pagave deri më datën 14 maj, ndonëse në kontratë kompania është e obliguar që pagesën e pagave ta bëjë deri më datën 5 të muajit vijues”, thuhet në komunikatën për media të sindikatës, përcjell Telegrafi.

Sindikata kërkon nga udhëtarët që të kenë mirëkuptim, pasi treni i linjës Prishtinë–Pejë të premten do të ketë vonesë njëorëshe nga ora 8.00-9.00 në stacionin hekurudhor të Fushë Kosovës, e cila sipas sindikalistëve është vetëm një masë paralajmëruese për veprimet e tjera sindikale që do të pasojnë më vonë. /Telegrafi/