Si të përmirësoni kujtesën me kalimin e moshës, sipas studimeve

Të ruash shëndetin dhe mprehtësinë e trurit ndërsa plakesh është një nga faktorët më të rëndësishëm për një proces plakjeje të shëndetshme dhe të lehtë.

Ka shumë mënyra për të kujdesur për trurin, por sipas një studimi të publikuar në Journal of Alzheimer’s Disease, aktiviteti fizik është një ndër më të rëndësishmit – dhe nuk duhet anashkaluar. Ja çfarë zbuluan studiuesit.

Studimi mbi shëndetin e trurit dhe ushtrimet fizike

Në këtë studim, kërkuesit dëshironin të ndërtonin mbi bazën e gjetjeve të mëparshme shkencore që mbështesin aktivitetin fizik si një mënyrë për të parandaluar demencën dhe sëmundjen e Alzheimerit. Ata synonin të analizonin më në thellësi mekanizmat që shpjegojnë këtë lidhje.

Për këtë qëllim, ata analizuan skanime të trurit të mbi 10,000 individëve, duke identifikuar ndryshimet në strukturën e trurit të lidhura me nivelet e ndryshme të aktivitetit fizik.

Në të gjitha këto skanime, u bë shumë e qartë se aktiviteti fizik është përfitues për trurin. Pjesëmarrësit që ushtronin rregullisht kishin jo vetëm vëllime më të mëdha të lëndës gri në tru (e cila është thelbësore për kujtesën, lëvizjen dhe emocionet), por gjithashtu kishin edhe më shumë lëndë të bardhë (që ndihmon në zgjidhjen e problemeve, përqendrimin, të nxënit dhe madje edhe në ekuilibër).

Siç shpjegon autori kryesor i studimit, Dr. Cyrus Raji, në një deklaratë për shtyp:

“Ushtrimet jo vetëm që ulin rrezikun e demencës, por gjithashtu ndihmojnë në ruajtjen e përmasës së trurit, gjë që është thelbësore me kalimin e moshës”.