Si qëndrojnë në sondazhe Trumpi dhe Bideni: Nga pandemia dhe ekonomia deri tek luftimi i krimit

Kandidati demokrat për president të SHBA-ve, Joe Biden kryeson kundrejt republikanit, Donald Trump me 12 për qind, tregoi sot një sondazh i Reutersit dhe Ipsosit.

Një sondazh i kryer midis 3 dhe 8 shtatorit zbuloi se 52 për qind e atyre që ka të ngjarë të shkojnë në votime do të mbështesnin Bidenin, ndërsa 40 për qind do të mbështesnin presidentin në detyrë.

Sondazhi u krye në internet në të gjithë SHBA, në 823 votues të mundshëm – 390 që identifikohen si demokratë dhe 351 që identifikohen si republikanë. Tre për qind e të anketuarve do të mbështesin kandidatin e tretë dhe vetëm 5 për qind nuk kanë marrë ende një vendim, dy muaj përpara zgjedhjeve të 3 nëntorit.

Sondazhi tregoi se numri i votuesve që nuk kanë vendosur ende për kandidatin e dy partive kryesore është dy herë më pak se në zgjedhjet e fundit, në vitin 2016, transmeton Telegrafi.

Por Trump ende mund të fitojë zgjedhjet, edhe nëse merr më pak vota sesa kundërshtari i tij, si në zgjedhjet e fundit ku kundërshtarja e tij, Hillary Clinton mori më shumë vota.

Fituesi i zgjedhjeve amerikane nuk vendoset nga numri i përgjithshëm i votave në nivelin e SHBA-ve, por nga një kolegj elektoral bazuar në numrin e votave nga shteti.

Clinton fitoi tre milionë vota më shumë se Trumpi në zgjedhjet mbarëkombëtare të vitit 2016, por ai përsëri fitoi.

Sondazhi, i pari i kryer nga Reuters dhe Ipsos këtë vit midis votuesve të ardhshëm, zbuloi se motivi kryesor për të shkuar në votime ishte pandemia e coronavirusit që mori më shumë se 186 mijë jetë dhe shkatërroi miliona vende pune në Shtetet e Bashkuara, si dhe besimin në fuqinë.

Lexo po ashtu Trumpi mblodhi dukshëm më pak para për fushatën presidenciale, Biden thyen edhe rekordin e Obamës

Rreth 28 për qind e votuesve thanë se vendimi i tyre u ndikua nga një mendim mbi aftësinë e një kandidati për të menaxhuar një pandemi dhe 23 për qind duke rifituar besimin tek qeveria.

Rreth 19 për qind e tyre i kushtojnë rëndësi aftësisë për të ngritur ekonominë në këmbë, dhe 14 për qind duan një kandidat që mund të luftojë më mirë krimin.

Rreth 51 për qind e të anketuarve besojnë se Biden do të kishte një përgjigje më të mirë ndaj virusit sesa 38 për qind e Trumpit, por republikani u pa si një kandidat më i fortë për sa i përket krimit dhe trazirave civile, me 45 për qind krahasuar me 40 për qind të Bidenit. /Telegrafi/