Shumë njerëz raportuan se kishin parë UFO në vitet 1960 – Pentagoni tregon se për çfarë bëhej fjalë

Sipas raportit të fundit të Pentagonit, një rritje e papritur e numrit të njerëzve që thonë se kanë parë një UFO në vitet 1960, ka të ngjarë të jetë shkaktuar nga testet e aeroplanëve të avancuar të spiunazhit amerikan dhe teknologjisë hapësinore. Zyrtarët kanë njoftuar se nuk ka “asnjë provë” se qeveria amerikane ka ndërvepruar me jashtëtokësorët.

Shumica e pamjeve të UFO-ve ishin objekte të zakonshme nga Toka, sipas një raporti të dorëzuar në Kongresin amerikan. Një zëdhënës i Pentagonit tha se zyrtarët iu afruan raportit “në mënyrë të hapur”, por “thjesht nuk gjetën prova të vizitorëve jashtëtokësorë”.

“Të gjitha përpjekjet hetimore, në të gjitha nivelet e klasifikimit, kanë arritur në përfundimin se shumica e pamjeve janë objekte dhe fenomene të zakonshme dhe rezultat i identifikimit të gabuar”, tha para gazetarëve gjeneralmajor Pat Ryder. Gjithashtu u theksua se raporti nuk do t’i shkëpusë ata që besojnë se jashtëtokësorët kanë zbritur në Tokë, shkruan newyorktimes.

“Shfaqja e programeve televizive, librave, filmave dhe sasia e madhe e përmbajtjes në internet dhe rrjetet sociale të përqendruara në tema të lidhura me UAP ka shumë të ngjarë të ketë ndikuar në diskursin publik mbi këtë temë dhe ka përforcuar besime të tilla në disa segmente të popullsisë”. thuhet në raport.

Sipas një sondazhi të Gallup të vitit 2021, pak më shumë se 40 për qind e amerikanëve mendojnë se anijet jashtëtokësore kanë vizituar Tokën.

Raporti i lëshuar të premten pason njoftimin e Pentagonit në vitin 2022 se Zyra e Rezolucionit të Anomalive të Gjithë Domeneve (AARO) e sapokrijuar atëherë nuk kishte gjetur asnjë provë që jashtëtokësorët kishin vizituar ose ishin rrëzuar në Tokë. /Telegrafi/