Shtyhet gjykimi i ministres Hajdari, mbrojtja kërkon që ekspertët të dëshmojnë për aksidentin

Seanca gjyqësore ndaj ministres së Industrisë, Ndërmarrësisë dhe Tregtisë, Rozeta Hajdari për aksidentin ku kishte goditur me veturë një fëmijë, është shtyrë për datën 11 tetor.

Pas përfundimit të kësaj seance në Gjykatën Themelore në Prishtinë, e pandehura ministrja Hajdari tha për kp se nuk ka ndonjë vendim nga seanca e sotme gjyqësore.

“Nuk ka vendim sot. Punë të mbarë juve”, theksoi ajo shkurt për KosovaPress

Ndërkaq, avokati i ministres, Shemdi Bunjaku tha se në seancë deklaruan për super ekspertizën, me ç’rast shtoi se i propozuan Gjykatës që për këtë të jenë të pranishëm edhe një grup i ekspertëve.

Bunjaku theksoi se seanca e sotme u ndërpre dhe është caktuar për ditën e mërkurë në orën 13:15.

Ai ka arsyetuar kërkesën për mbajtjen e seancës pa praninë e mediave, ku kundër kësaj kërkese ishte avokati i palës së dëmtuar, Florim Shefqeti.

Bunjaku tha se kjo është bërë për të respektuar Ligji për mbrojtjen e fëmijëve.

“Sot është mbajtur seancë në Gjykatën për kundërvajtjen lidhur me aksidentit që pretendohet se është aksidentuar nga drejtuesja e automjetit, Rozeta Hajdari e që Gjykatës i propozuam ta mbyll seancën duke respektuar Ligjin për mbrojtjen e fëmijëve, me qëllim të mbrojtjes së të miturës. Në seancë u deklaruam që i kemi super ekspertizën të përgatitur nga Fakulteti i Inxhinierisë Mekanike e për të cilën i propozuam Gjykatës që të jetë grupi i ekspertëve në seancë me qëllim të sqarimit të përgatitjes së kësaj seance deri në përfundimin e saj për të vërtetuar gjendjen reale faktike lidhur me aksidentin. Seanca e sotme u ndërpre dhe u caktua për datën 11 në ora 13:15”, tha Bunajku.

Sa i përket super-ekspertizës, Bunjaku tha se në momentin e aksidentit, Hajdari ka qenë duke e respektuar ligjin e komunikacionit.

“Ministrja Hajdari lidhur me ekspertizën, nuk është ajo që ka kontribuar në aksident, nuk është drejtuesja e automjetit. Rozetë Hajdari në momentin e aksidentit ka qenë duke respektuar ligjin për komunikacionin, shenjat dhe veprimet të cilat i ka ndërmarrë. Në bazë të gjithë ekspertizës janë veprime të lejuar ligjore për të cilat, ne kemi kërkuar që grupi i ekspertëve të jetë në seancë për laborimin e kësaj ekspertizë me qëllim të vërtetimit të gjendjes reale faktike meqenëse kemi të bëjmë me të mitur prezent”, shtoi Bunjaku, raporton kp.

Sa i përket mbylljes së seancës për medie, nuk u pajtua avokati i palës së dëmtuar, Florim Shefqeti.

Sipas tij, ky vendim erdhi pasi e pandehura kishte për të deklaruar lidhur me rastin.

“Ishte një kërkesë nga përfaqësuesit e të pandehurës për mbylljen e seancës. Ne i kemi dhënë kundërshtimet tona që kjo seancë nuk është dashur të mbyllet nga fakti se vet kërkesa e përfaqësuesve të pandehurës për mbylljen e seancës është në kundërshtim me vet qëndrimin e tyre të seancës të datës 08.12.2022, ku shihet se edhe aty kanë marrë pjesë monitorues nga mediet, dhe asnjë vërtetje nuk ka ekzistuar nga pala pandehur lidhur me pjesëmarrjen e mediave. Por, tani kur ka ardhur koha që të bëhet deklarimi i të pandehurës, pra faza e procedurës, atëherë vjen kjo kërkesë. Konsiderojmë se ky vendim nuk është dashtë të merret për mbylljen e seancës, sepse e mitura nuk do të bëjë deklarim e cila do t’i jepte arsyeje mbylljes së seancës”, tha Shaqiri.

Më 10 prill të vitit 2022 një aksident kishte ndodhur në lagjen “Arbëria” në Prishtinë ku ishte aksidentuar një fëmijë, në këtë aksident ishte e përfshirë Ministrja e Industrisë, Ndërmarrsisë dhe Tregtisë, Hajdari. Aksidentin në fjalë e kishte konfirmuar edhe policia.