Shtatë problemet që po shkatërrojnë librin

Kryetari i Shoqatës së Botuesve Shqiptarë, Petrit Ymeri, jep alarmin për situatën e librit në Shqipëri. Ndonëse Panairi i 21-të i Librit mund të quhet i suksesshëm, sipas Ymerit, lexueshmëria në Shqipëri është në nivele katastrofike duke konfirmuar shifrën e INSTAT se një milionë shqiptarë nuk kanë lexuar asnjë libër.

Në një letër që i ka dërguar ministrit të Financave Arben Ahmetj, ministres së Kulturës Mirela Kumbaro, kryetares së Komisionit Parlamentar për Median dhe Mjetet e Informimit Publik, Albanë Vokshi, dhe kryetarit të Komisionit Parlamentar të Ekonomisë, Erion Braçe, ai i kërkon ndërhyrjen urgjente nëpërmjet rregullimeve ligjore në mënyrë që gjendja të ndryshojë sa më shpejt dhe që shifra një milionë të mos rritet.

Letra u bë publike dje nga gazetari Roland Qafoku në emisionin “Debati në Channel One” në të cilin ishte ftuar deputetë të komisionit parlamentar të Medias, vetë kryetari i shoqatës, Petrit Ymeri, por edhe shkrimtarë dhe botues.

Ja cilat janë problemet e paraqitura në instancat shtetërore nga Ymeri:

– Mungesa e bibliotekave publike në shkallë vendi. Përveç disa minibibliotekave në Tiranë, ka një mungesë totale të bibliotekave. Ngritja dhe hapja e tyre do bëjë që shqiptarët të afrohen me librin, ta lexojnë atë edhe nëse nuk kanë mundëisnë ta blejnë.

– Nuk ka asnjë pasurim të librave që nga vitit 2012 për bibliotekat ekzistuese. Shtetei nuk ka asnjë financim për pasurimin e bibliotekave në të cilat mungojnë masivisht librat dhe nuk furnizohen prej 6 vitesh.

– Shteti bën restaurim të godinave me tulla, pllaka, e vetrata, por shteti nuk ble libra për bibliotekat në shkolla dhe ato publike.

– TVSH-ja me 20 për qind në blerje të librit dhe 0 për qind në shitje sjell rritjen e kostos dhe e shkatërron botimin e librit.

– Ekzistenca e shtëpive botuese fantazmë që kanë shtypshkronjë, por nuk kanë shtëpi reale botuese është një problem dhe pengesë për një aktivitet ligjor dhe cilësor.

– Rritja e tatimit me 50 për qind të honorarëve e dëmton botimin, por shkatërron dhe dekurajon punën krijuese.