Shtabi i Krizës në Tetovë: Shpërndahen pajisje mbrojtëse për qytetarët

Shtabi i Krizës në Komunën e Tetovës bëri të ditur se gjatë tre ditëve të fundit kanë punuar për dorëzimin e pajisjeve mbrojtëse për qytetarët, duke paralajmëruar se do të vazhdojnë edhe ditëve në vijim.

Sipas kryetares Teuta Arifi do të shpërndahen 15 mijë paketime me maska mbrojtëse, doreza dhe fletëpalosje me informacione, si masë parandaluese për mbrojtje nga përhapja e Kovid-29 në territorin e Komunës së Tetovës.

“Sipas planit, shpërndarja ka filluar në lagjet qendrore dhe periferike, ndërsa në ditët në vijim do të përfshihen fshatrat e Komunës së Tetovës. E shfrytëzoj këtë rast t’u shpreh falënderim të punësuarve në administratën komunale, siç është ndërmarrja publike Parkingu i Qytetit për përfshirjen e tyre aktive dhe punën e tyre në paketimin dhe shpërndarjen e këtyre pakove në shtëpitë e qytetarëve”, theksoi Arifi.

Në rajonin e Tetovës, sipas Shtabit të Krizës, janë regjistruar 89 të sëmurë nga Kovid-19 edhe atë në Komunën e Tetovës 39 (dy të vdekur), Bogovinë 29 (dy të vdekur), Tearcë 6, Bërvenicë 6 (një i vdekur), Jegunocë 4 dhe Zhelinë 5 (një i vdekur).

“Sot në Tetovë dhe rrethinë janë regjistruar katër raste të reja me Kovid-19. Deri më tani janë shëruar 42 persona, ndërsa gjashtë kanë vdekur”, informoi Arifi.

Në rajonin e Tetovës janë kryer 358 teste për indikacion epidemiologjik (nga të cilat 80 mostra kontrolluese) nga ana e Qendrës për Shëndet Publik, derisa përmes “Termi Im” gjithsej 132 teste./Telegrafi/