Shqipëria renditet e pesta mes 10 vendeve në të gjithë botën, ku femrat mund të udhëtojnë vetëm. Travel Off Path, një faqe e cila pasqyron opinione, jep këshilla apo bën sygjerime për turistët dhe udhëtarët që duan të vizitojnë vende të ndryshme të botës, sipas profileve të tyre, e vlerëson maksimalisht Shqipërinë, duke ua këshilluar femrave që duan të ndërrmarrin udhëtime vetëm.
Udhëtimi i vetëm i femrave tashmë është më shumë se një trend. Madje mund të jetë një përvojë që ndryshon edhe jetën.
Sipas Travel Off Path, Shqipëria është tashmë destinacioni që është bërë trendi në Ballkan dhe është një zgjedhje e shkëlqyer për gratë që udhëtojnë vetëm, raporton rtsh.
“Shumë femra që shkruajnë në faqes kanë eksploruar Shqipërinë, madje kanë jetuar atje. Pasi vizitojnë plazhet e paprekura të Rivierës shqiptare, disa udhëtarë e quajnë Shqipërinë “Greqia me buxhet të ulët”, por është shumë më tepër se kaq.”- shkruhet në faqe.
Sipas saj, qytetet historike në kodër dhe një kryeqytet nomad digjital në rritje e bëjnë Shqipërinë një nga vendet më të këndshme në rajon. Paralelisht Travel Off Path vlerëson edhe mikpritjen shqiptare duke nënvizuar se “është më e mira dhe absolutisht e pashembullt”.
“Udhëtaret do të gjejnë vendas miqësorë dhe nuk do t’u mungojë ndihma kudo që të shkojnë në këtë vend spektakolar.”- thuhet në shkrimin e publikuar nga Travel Off Path.
Në këtë listë renditen vende si Islanda, Sllovenia, Emiratet e Bashkuara Arabe, Japonia, Argjentina, Irlanda, Oman, Kroacia dhe Malajzia.
Më shumë gra po udhëtojnë tani vetëm nëpër botë, më shumë se kurrë më parë. Mbi 70% e ekspertëve të udhëtimeve thonë se gratë kanë më shumë shanse se burrat që të udhëtojnë vetëm, ndërsa gati 3 në 4 gra amerikane e kanë bërë tashmë një udhëtim të vetëm. Këto shifra vazhdojnë të rriten./ Traveloffpath