Shqipëri-Kosovë, organizohet panairi i përbashkët bujqësor në Prishtinë

Marrëveshja e nënshkruar pak kohë më parë në Prishtinë, ndërmjet Këshillit të Agrobiznesit Shqiptar (KASH) dhe Odës Ekonomike të Kosovës, i ka hapur rrugë zhvillimit për herë të parë në Prishtinë, të panairit të prodhimeve bujqësore shqiptare, Shqipëri- Kosovë, si eventi që do të bashkojë dy vendet e një kombi në një treg të përbashkët.

Këshilli i Agrobiznesit Shqiptar (KASH), Oda Ekonomike e Kosovës (OEK) në bashkëpunim me Ministrinë e Bujqësisë, Pylltarisë dhe Zhvillimit Rural, dhe kompaninë Albexpo, do të organizojnë në Qendrën e Panaireve, Prishtinë, nga 30 shtator – 3 tetor 2015, edicionin e 9 të “Panairit të Produkteve Bujqësore dhe Agroindustriale”, që ndryshe do të quhet “Panairi i prodhimeve bujqësore shqiptare”.

Ky aktivitet i kthyer tashmë në një traditë për të gjithë fermerët dhe agropërpunuesit kosovarë, do të marrë një vlerë të shtuar dhe rëndësi të veçantë në edicionin e këtij viti. Për herë të parë panairit bujqësor të Kosovës do t’i bashkohet në mënyrë të organizuar edhe agrobiznesi shqiptar, duke e zhvendosur në Prishtinë, Panairin e Agrobiznesit Shqiptar, i parashikur të zhvillohej në 30 shtator në Tiranë.

Biznesmenë të afirmuar nga Shqipëria, që kanë konsoliduar tashmë veprimtarinë e tyre në sektorin e agropëpunimit, do të marrin pjesë në Panairin e Produkteve Bujqësore dhe Agroindustriale, në Prishtinë, duke iu bashkuar vëllezërve kosovarë, në promovimin e vlerave dhe risive që ka kurorëzuar ky sektor gjatë një viti.

Biznesmenë shqiptarë dhe kosovarë do të jetë të pranishëm në këtë Ekspo, të dizenjuar nga stafi i specializuar i kompanisë “Albexpo” për të diskutuar nga afër mënyrat e reja të prodhimit, perpunimit dhe financimit të projekteve strategjike në sektorin e bujqësisë dhe agropërpunimit.

Kosova dhe Shqipëria kanë resurse në fushën e bujqësisë të paeksploruara ende dhe është në mision të organizatave të biznesit të dy vendeve, për t’i bërë ato atraktive për një treg të qëndrueshëm shqiptar. /ATSH/Telegrafi/