Shpërndanin drogë dhe mbanin armë pa leje, arrestohen tre të rinj në Bulqizë

Tre persona janë arrestuar në Bulqizë për shpërndarje droge dhe armëmbajtje pa leje, si edhe një i tretë po hetohet në gjendje të lirë.

Policia ndaloi për kontroll dy automjete brenda të cilave udhëtonin të ndaluarit . R., 22 vjeç, F. S., 19 vjeç dhe E. A., 20 vjeç, ku nga hetimet rezultoi se këta shtetas funksiononin si grup kriminal që merrej me shpërndarjen e lëndëve narkotike, në zonën e Fushë-Bulqizës dhe në qytetin e Bulqizës.

Gjithashtu nisi procedimi penal në gjendje të lirë për shtetasin A. D., 21 vjeç, banues në Bulqizë. Në makinën me shofer F. S. u gjet i fshehur një shkop gome si i Policisë, ndërsa pasagjerit në këtë mjet, E. A., i janë gjetur doza me kanabis.

Më pas u kontrollua banesa e I. R., ku u gjetën dhe sekuestruan rreth 2 kilogramë lëndë kanabis, rreth 150 gramë kanabis e ndarë në doza, 1 bimë e dyshuar narkotike e kultivuar në tokë dhe 170 kg duhan i ndarë në pako, që dyshohet se është kontrabanduar. Gjatë kontrollit në banesën e F. S. u gjet dhe u sekuestrua një pushkë model 56.

Materialet i kaluan Prokurorisë pranë Gjykatës së Shkallës së Parë Dibër, për veprat penale “Prodhimi dhe shitja e narkotikëve”, “Kultivimi i bimëve narkotike”, “Mbajtja pa leje dhe prodhimi i armëve, armëve shpërthyese dhe i municionit”, “Prodhimi, mbajtja, blerja apo shitja pa leje e armëve të ftohta” dhe “Kontrabanda me mallra për të cilat paguhet akcizë”. /Telegrafi/