Shpallet gjendje të emergjencës civile në Vushtrri për shkak të rrezikut nga vërshimet

Për shkak të rrezikut nga vështrimet e Lumit Silnica, kryetari i komunës së Vushtrrisë, Xhafer Tahiri ka vendosur të shpallë gjendje të emergjencës civile në Vushtrri.

Tahiri këtë e ka bërë të ditur përmes një postimi në Facebook, ku ka njoftuar po ashtu se është rritur rreziku të vërshohet qyteti, por edhe fshatrat e komunës së Vushtrrisë.

Komuna po ashtu ka caktuar një palestër në Samadrexhë, si vend për strehim në rast nevoje.

Njoftimi i plotë:

Njoftim me rëndësi

Për shkak të rrezikut nga vërshimet nga Lumi Silnica, kam marrë vendim të shpallë gjendje të emergjencës civile në Vushtrri!

Reshjet e fundit kanë bërë që Lumi Llap e Drenica të rrisin jashtëzakonisht shumë prurjet më Lumin Silnica që rrit rrezikun e vërshimeve në Qytet dhe fshatrat e Vushtrrisë.

Kam urdhëruar rritjen e gatishmërisë maksimale të gjitha ekipeve emergjente komunale.

Pikat kritike pritet të jenë vendbanimet përgjatë Lumit ‘Silnica’, Qyteti i Vushtrrisë, Pestova, Prelluzha, Lumi i Madh, Nedakoci.

Janë kontaktuar kryetarët e fshatrave dhe janë këshilliar banorët afër lumit Silnica që sonte gjatë gjithë natës të kenë kujdes maksimal. Mundësisht të largohen njerëzit dhe makineritë nga ato shtëpi që zakonisht kanë probleme në rast të vërshimeve.

Palestra në Samadrexhë është caktuar si vend për strehim në rast nevoje. Po ashtu edhe objektet tjera si shkollat po bëhen gati për këtë qëllim. /Telegrafi/