Shkodra: Protestat e Policisë së Kosovës nuk janë në kohën e duhur

Ish-zëvendës ministri i Punëve të Brendshme, Selam Shkodra, ka shprehur shqetësimin se protestat aktuale të Policisë së Kosovës nuk janë në kohën e duhur. E, njohësi i çështjeve të sigurisë, Drizan Shala, ka propozuar që organizatorët ta kthejnë presionin tek drejtori i Policisë së Kosovës dhe kryetari i Sindikatës së Policisë.

Shkodra ka deklaruar se kërkesat e Policisë së Kosovës nuk janë në kohën e duhur për shkak të situatës së sigurisë në vend.

“Ky është një lajm jo i mirë për shkak se protestat në këtë kohë kur vendi po kalon një sfidë në rrafshin e sigurisë nuk janë të duhura dhe mendoj se institucionet e vendit do të duhej të bënin më shumë që të dakordoheshin më Njësinë Speciale me qëllim që të arrinin një marrëveshje e cila do të fillonte zgjidhjen e kërkesave të tyre. Të dy palët janë pozicionuar skajshmërisht. Pritja ime ka qenë që do të afrohen palët gjatë kësaj periudhe kohore, duke bashkëbiseduar dhe duke krijuar ekipe pune me qëllim që të çonin në zgjidhjen e atyre kërkesave dhe tashmë është faktike që nesër do të ballafaqohen me atë protestë”, ka thënë Shkodra, në emisionin “FIVE” të RTV Dukagjinit.

Lexo po ashtu Nuk arritën marrëveshje me Kurtin, njësitë speciale paralajmërojnë sërish protestë për të shtunën

Tutje ai ka theksuar se “projektbuxheti është finalizuar dhe tashmë jemi para aktit të kryer dhe në këtë fazë çdo presion i kësaj forme është i panevojshëm dhe nuk arrin qëllimet e veta”.

“Do të ishte e rrugës që të merren në konsideratë kërkesat e Policisë së Kosovës dhe të njëjtat do të ishte mirë që të zgjidheshin. Policia do të duhet të kishte më shumë mirëkuptim në rastin konkret sa i përket situatës së sigurisë ku gjendet vendi, por edhe Qeveria e Kosovës do të duhet t’i merr më seriozisht gjithë ato kërkesa që vijnë nga ana e tyre, por ndoshta nuk janë në kohën e duhur”, vijon ai.

Në anën tjetër, njohësi i çështjeve të sigurisë Drizan Shala ka deklaruar se organizatorët duhet të reflektojnë dhe të kthejnë presionin tek drejtori i Policisë së Kosovës dhe kryetari i Sindikatës së Policisë, ku më pas ata do të drejtonin kërkesat e tyre drejt qeverisë.

“Kjo qeveri do të duhej të reflektonte në aspektin e kërkesave të përgjithshme… Në kontekstin aktual, dita e nesërme nuk do të duhej të kishte fare protestë nga ana e policisë, por do të duhej që tani të reflektonin organizatorët dhe t’i kthehet presioni tek drejtori i Përgjithshëm i Policisë së Kosovës së bashku me kryetarin e Sindikatës së Policisë së Kosovës. Ata të jenë dy protaganistët kryesorë që duhet të avancojnë më tutje në nivelin politik në shtruarjen e kërkesave të tyre për kabinetin qeveritar”, ka thënë Shala. /Dukagjini/