Shefi i OSBE-së në Kosovë: Përpjekjet për të frikësuar apo kërcënuar zyrtarët policorë “duhet të dënohen pa rezerva”

Shefi i misionit të Organizatës për Siguri dhe Bashkëpunim në Evropë – OSBE në Kosovë, Michael Davenport, ka reaguar lidhur me mesazhet kërcënuese që po marrin policët e komunitetit serb, të cilët e kanë marrë detyrën në fillim të kësaj jave.

Përmes një postimi në Twitter, ai ka thënë se të gjitha përpjekjet për të frikësuar apo kërcënuar oficerët e PK-së apo kadetët që fillojnë karrierën në polici “duhet të dënohen pa rezerva”.

“Të gjitha përpjekjet për të frikësuar apo kërcënuar oficerët e PK-së apo kadetët që fillojnë karrierën në polici duhet të dënohen pa rezerva. Ata që janë përgjegjës duhet t’i nënshtrohen me vendosmëri llogarisë”, ka shkruar Davenport.

Lexo po ashtu Ish-drejtori i Policisë: Beogradi po ushtron presion të hatashëm mbi policët serbë në Kosovë dhe familjet e tyre

Ai tutje është shprehur se misioni i OSBE-së mirëpret dhe mbështet aktivisht angazhimin e Policisë së Kosovës në rritjen e kontaktit me të gjitha komunitetet dhe prioritizimin e rekrutimit të kadetëve nga komunitetet joshumicë në mbarë Kosovën.

“Një forcë policore profesioniste kudo duhet të pasqyrojë diversitetin e popullsisë që është aty për t’i shërbyer”, ka përfunduar shefi i OSBE-së në Kosovë.

The OSCE Mission welcomes and actively supports the engagement of Kosovo Police in stepping up outreach to all communities & prioritising recruitment of cadets from non-majority communities all around Kosovo 1/3

— Michael Davenport (@DavenportOSCE) July 26, 2023

Me të marrë detyrën e re në fillim të kësaj jave, policët nga komuniteti serb që u vendosën në pjesën veriore të Kosovës, u bënë cak i një fushate linçuese nga Serbia.