SHBA në krye me Phelps nuk ndalen (Video)

Një natë e pabesueshme në not, një natë historike ajo në pishinën olimpike të “Olympic Aquatics Stadium”. Tre rekorde botërore, dy prej të cilëve fantashkencorë. Më pas, rreth orës 05:00 me orën shqiptare, qershia mbi tortë: SHBA fitojnë 4 x 100 stil i lirë, me Michael Phelps që fiton medaljen e tij të artë numër 19 në Olimpiada (në total, 23).

Sjostrom “fluturon” në stilin flutur

100 metra stil flutur që Sarah Sjostrom i ka fituar me lehtësi dhe duke vendosur rekord të ri botëror: 55” 48, duke thyer rekordin që mbante po vetë dhe që e kishte vendosur një vit më parë (55” 64). Në vend të dytë kanadezja 16-vjeçare Penny Oleksiak dhe në vend të tretë amerikania Dana Vollmer.

Peaty rishkruan historinë

Në 100 metra bretkosë noton si askush më parë. Adam Peaty i jep të artën Britanisë së Madhe duke treguar se është një fenomen i vërtetë. 22-vjeçari dominoi garën dhe fitoi me kohën 57”13, duke ulur me 42 të qindtat rekordin e vendosur të shtunën në baterinë e tij. Në vend të dytë afrikanojugori Cameron Van der Burgh dhe amerikani Cody Miller.

Ledecky, një rekord i mahnitshëm

Medaljen e parë të artë për SHBA-në e sjell Katie Ledecky. Në garën e 400 metrave stil i lirë ka fituar me kohën 3’56″46, e para femër në histori që zbret poshtë 3 minutave e 57 sekondave. Rekordi i mëparshëm, që e mbante po vetë, ishte 3’58”37. Në vend të dytë britanikja Jazz Carlin dhe në vend të tretë amerikania Leah Smith.

Phelps, tjetër medalje ari

Medalja e artë e radhës në Lojërat Olimpike për Michael Phelps. Në stafetën 4 x 100 stil i lirë, ndihmon shokët për të lënë pas Francën dhe Australinë. 30-vjeçari Phelps ishte tërhequr pas “Londër 2012”, por u kthye për të fituar medaljen e tij të artë numër 19 nëpër Olimpiada. Përbindësh!

Michael Phelps won his first gold medal in 4x100m Freestyle Relay in Rio; 19 Olympic golds now for Phelps! https://t.co/MXUE0eJMKc

— andy  #happypridemonth 🏳️‍🌈 (@andychester_) August 8, 2016