SHBA-ja shfrytëzon veton në OKB, bllokon rezolutën që kërkon armëpushim të menjëhershëm në Gaza

Shtetet e Bashkuara kanë përdorur të drejtën e vetos për të bllokuar një rezolutë të Këshillit të Sigurimit të Kombeve të Bashkuara, e cila kërkonte një armëpushim të menjëhershëm dhe të pakushtëzuar në luftën në Gaza.

Kjo rezolutë, e sponsorizuar nga dhjetë shtete të zgjedhura, gjithashtu përfshinte një kërkesë të drejtpërdrejtë për lirimin e të gjithë pengjeve të mbajtur nga Hamasi pas sulmeve të 7 tetorit 2023 në Izrael.

Votimi në Këshillin e Sigurimit ishte 14-1, ku vetëm Shtetet e Bashkuara e përdorën të drejtën e vetos. Këshilli i Sigurimit përbëhet nga 15 anëtarë, duke përfshirë pesë anëtarët e përhershëm (SHBA, Rusia, Kina, Britania dhe Franca) dhe 10 shtetet e zgjedhura për një periudhë të caktuar.

Pesë anëtarët e përhershëm kanë të drejtë të hedhin veto mbi çdo vendim, ndërsa anëtarët e zgjedhur nuk kanë këtë mundësi, shkruan reuters.

Rezoluta e propozuar kërkonte një armëpushim të menjëhershëm dhe të përhershëm, i cili duhet të respektohej nga të gjitha palët, duke përfshirë Izraelin dhe Hamasin.

Ajo gjithashtu theksonte rëndësinë e lirimit të menjëhershëm dhe pa kushte të të gjithë personave të mbajtur peng nga grupet e armatosura, një çështje që ka shkaktuar tensione ndërkombëtare pas ngjarjeve të 7 tetorit, kur shumë njerëz, përfshirë izraelitë dhe shtetas të tjerë, u morën peng nga Hamasi.

Ky veprim ka nxitur polemika dhe ka reflektuar ndasitë ndërkombëtare lidhur me trajtimin e konfliktit izraelito-palestinez, veçanërisht në lidhje me trajtimin e pengjeve dhe mundësinë e një armëpushimi të përgjithshëm. /Telegrafi/