SHBA beson se armëpushimi i luftës në Ukrainë mund të arrihet deri në Pashkë
Mediumi prestigjioz Bloomberg ka raportuar se administrata e Donald Trump synon të sigurojë një marrëveshje të gjerë armëpushimi midis Rusisë dhe Ukrainës deri në Pashkë.
Gazeta raporton se Shtëpia e Bardhë po synon një marrëveshje armëpushimi deri më 20 prill, shkruajnë mediat e huaja, përcjell Telegrafi.
Por Shtëpia e Bardhë thuhet se pranon se ky afat kohor është ambicioz duke pasur parasysh boshllëqet e mëdha midis Ukrainës dhe Rusisë në negociatat e armëpushimit.
Kujtojmë se Rusia ka paraqitur kërkesa maksimaliste për çdo marrëveshje, duke përfshirë fundin e furnizimeve me armë për Ukrainën, një pozicion që Kievi dhe aleatët e tij e kanë hedhur poshtë.
Shtëpia e Bardhë, e cila ndaloi shkurtimisht dërgesat e armëve jetike në fillim të këtij muaji për të ushtruar presion mbi Ukrainën, nuk ka rënë dakord për asnjë kufi deri më tani, citohet të kenë thënë burimet.
Lajmi vjen pasi Donald Trump i ka thënë uebsajtit sportiv amerikan Outkick se lufta në Ukrainë është "disi nën kontroll" dhe se ai ka një marrëdhënie të mirë me presidentin ukrainas Volodymyr Zelensky dhe presidentin rus Vladimir Putin.
Duke folur nga bordi i Air Force One, Trump tha se ishte i shqetësuar se konflikti mund të çonte në "Luftën e Tretë Botërore".
"Do të ishte një gjë e mrekullueshme të mund ta ndalonim atë. Dhe unë do ta them këtë, askush tjetër nuk do të mund ta bënte".
“Ne kemi pasur disa diskutime shumë racionale, dhe unë thjesht dua të shoh që njerëzit të mos vriten. Ata po humbasin 2500 fëmijë të vegjël në javë, dhe ata janë rusë dhe ukrainas”. /Telegrafi/