Shaolin Gang futet në ‘The Top List’ me këngën e re

Të njohur më parë si dyshja DJ Blunt dhe Real 1, tashmë dy artistët kanë ndryshuar emrin dhe njihen me emrin e ri të artit, Shaolin Gang.

Të shndërruar në një fenomen në rrjetet sociale, ku janë komentuar së tepërmi në lidhje me projektin muzikor “Qika Jeme”, Shaolin Gang janë bërë tepër aktivë muajt e fundit duke publikuar projekte të njëpasnjëshme.

Brenda një periudhe gjashtëmujore, Shaolin Gang ka publikuar rreth tetë projekte muzikore, ku disa prej tyre kanë qenë pjesë e klasifikimit të 100 këngëve më të bukura të muzikës moderne shqiptare.

Lexo po ashtu Lajmet për Shaolin Gang

“Dubai”, një këngë e publikuar rreth tre muaj më parë, falë votave të publikut, është bërë pjesë e “The Top List” që në javën e parë të publikimit. Kjo këngë, e cila tregon aventurat që bëhen në Dubai, ka mundur t’i rezistojë klasifikimit për gjashtë javë rresht.

“Lean Lean” është një tjetër projekt muzikor i dyshes së famshme, e cila ka tërhequr vëmendjen e publikut që në ditët e para të publikimit. Kjo prurje e artistëve, e cila është publikuar rreth dy muaj më parë, ka qëndruar në “The Top List” për tri javë rresht.

Sikurse përmendëm dhe pak më lartë, Shaolin Gang nuk di të ndalet pasi vetëm një javë më parë ka nxjerrë në treg projektin më të ri muzikor i titulluar “VVS”.

Falë votave nga ana e publikut, kjo këngë është futur menjëherë në klasifikimin zyrtar të “Top Awards” dhe këtë javë renditet në vendin e 90-të. /TopChannel/