Serbia shpërfill marrëveshjen, vazhdon regjistrimin e automjeteve me targa ilegale të qyteteve nga Kosova

Qeveria e Serbisë ka miratuar një Rregullore, e cila do të mundësojë vazhdimin e regjistrimit të automjeteve me targa paralele të qyteteve nga Kosova.

Sipas gazetës serbe “Danas” bëhet fjalë për Rregulloren për kushtet e veçanta për vlefshmërinë e regjistrimit të mjeteve motorike që kanë shenja regjistrimi të qyteteve dhe komunave në territorin e Kosovës, e cila hyn në fuqi sot.

Siç njofton Qeveria e Serbisë, me miratimin e kësaj rregulloreje, tash e tutje do të vazhdohet regjistrimi i të gjitha automjeteve me shënjimin KM, PR, GL dhe emrat e qyteteve tjera serbe në territorin e Kosovës.

“Këto automjete do të mund të lëvizin lirshëm si më parë në komunikacion, me posedim të policës së sigurimit të detyrueshëm dhe dëshmisë së kontrollit teknik të automjetit, jo më e vjetër se një vit. Qeveria e mori vendimin në përputhje me rregulloren për regjistrimin e automjeteve të autoriteteve kompetente të Republikës së Serbisë, si dhe marrëveshjen e arritur në kuadër të dialogut ndërmjet Beogradit dhe Prishtinës për parandalimin e përshkallëzimit të situatës dhe vazhdimin e kërkimit për zgjidhje të përhershme të çështjes së targave të automjeteve”, thuhet në vendimin e Qeverisë së Serbisë, transmeton Telegrafi.

Ndryshe, në marrëveshjen për targat, të arritur në Bruksel më 23 nëntor të këtij viti, sipas përfaqësuesit të Lartë të BE-së për politikë të jashtme, Josep Borrell, Serbia do të ndalojë lëshimin e targave me emërtimet e qyteteve të Kosovës dhe Kosova do të ndërpresë veprimet e mëtejshme në lidhje me riregjistrimin e automjeteve.

Ndaj vendimit të Qeverisë ka reaguar ish-ministrja e Jashtme e Kosovës, Melisa Haradinaj.

“Vetëm dy javë pasi u arrit marrëveshje për të ndaluar lëshimin e targave të Millosheviqit me denominim e të qyteteve të Kosovës, Serbia ka vendosur të mundësojë zgjatjen e këtyre targave të njëjta ilegale të cilat është pajtuar të ndërpresë”, ka shkruar Haradinaj në Twitter.

NEW LOW: Only 2 weeks after the deal to stop issuing #Milosevic car-plates with #Kosovo cities' denominations, #Serbia decides to enable the extension of the same illegal car-plates it agreed to discontinue.https://t.co/8tbu8teDoE

— Meliza Haradinaj (@MelizaHaradinaj) December 7, 2022

Ndaj këtij vendimi të Qeverisë së Serbisë ende nuk ka ndonjë reagim nga Qeveria e Kosovës. /Telegrafi/