Lajme Kosovë

Serbia dërgon një amandament ku kërkon shtyrjen e pranimit të Kosovës në Këshillin e Evropës

Para 7 muajve

Delegacioni i Serbisë në Këshillin e Evropës ka dorëzuar një amendament ku kërkon shtyrjen e pranimit të Kosovës në këtë organizatë.

Raportohet se deri më tani janë dorëzuar 15 amendamente në tekstin e rekomandimit për pranimin e Kosovës në Këshillin e Evropës, i cili nesër do të debatohet nga deputetët e Asamblesë Parlamentare të KiE.

Është kërkuar që Amendamenti nëntë të ndryshojë tekstin në mënyrë që Kuvendi të kërkojë nga Komiteti i Ministrave që të shtyjë vendimin për kërkesën për anëtarësim të Kosovës.

“Prandaj Kuvendi i rekomandon Komitetit të Ministrave që të shtyjë vendimin për aplikimin për anëtarësim derisa Këshilli i Sigurimit i Kombeve të Bashkuara të përcaktojë apo miratojë përfundimisht statusin e Kosovës”, thuhet në amendamentin e propozuar nga anëtarët e delegacionit serb.

Në tekstin që do të diskutohet me Amendamentin 14, propozohet të shkruhet se Kosova duhet të ftohet për anëtarësim “pasi të zbatohen të gjitha nenet e Marrëveshjes së Brukselit dhe Ohrit, duke përfshirë themelimin e Asociacionit”.

Presidenti i Serbisë, Aleksandar Vuçiq, ka thënë të hënën se beson se me përpjekjet e Francës, vendimi për pranimin e Kosovës në Këshillin e Evropës mund të shtyhet më 16 maj në mbledhjen e Komitetit të Ministrave.

Në njërin prej amendamenteve, nën numrin dy, kërkohet fshirja e paragrafit të tretë të rekomandimit, ku thuhet: “Kuvendi njeh progresin që ka bërë Kosova në fushën e të drejtave të njeriut, demokracisë dhe sundimit të ligjit dhe vlerëson progresin e bërë nga qeveria aktuale, duke përfshirë luftën kundër korrupsionit dhe partneritetin civil për çiftet e të njëjtit seks”, raporton Danas.

Ndërsa amendamenti numër tre kërkon të zëvendësojë paragrafin.

Në vend të paragrafit ku shkruhet: “Kuvendi beson se aspiratat e Kosovës për anëtarësim në Këshillin e Evropës duhet të marrin përgjigje pozitive”. Anëtarësimi do të çonte në forcimin e standardeve të të drejtave të njeriut duke ofruar qasje në Gjykatën Evropiane për të Drejtat e Njeriut për të gjithë ata që janë nën juridiksionin e Kosovës. Ai gjithashtu do t’i mundësonte Këshillit të Evropës të ketë një mbikëqyrje më të madhe të zhvillimeve të brendshme dhe të përdorë të gjitha instrumentet që ka në dispozicion për të kontribuar në konsolidimin e demokracisë dhe shtetit të së drejtës. Për më tepër, anëtarësimi në Këshillin e Evropës do të përbënte një pikë kthese në procesin e integrimeve evropiane të Kosovës”.

Kërkohet të ndryshohet në: “Kuvendi beson se aspiratat e Kosovës për t’u anëtarësuar në Këshillin e Evropës nuk duhet të përballen me pozitivitet. Anëtarësimi do të çonte në persekutim dhe mosndëshkim të mëtejshëm, pasi shumë krime me motive specifike etnike mbeten të pandëshkuara. Gjithashtu do t’i mundësonte Këshillit të Evropës të ketë një mbikëqyrje më të madhe të zhvillimeve të brendshme dhe të përdorë të gjitha instrumentet në dispozicion për të kontribuar në konsolidimin e demokracisë dhe shtetit të së drejtës. ato që kanë të bëjnë me dialogun ndërmjet Beogradit dhe Prishtinës, dhe normalizimin e marrëdhënieve ndërmjet Beogradit dhe Prishtinës”.

Në vend të paragrafit gjashtë ku shkruhet: “Anëtarësimi i Kosovës në Këshillin e Evropës do të përfaqësonte kulmin e dialogut që u zhvillua në një periudhë prej dy dekadash, por në asnjë mënyrë nuk duhet parë si fundi i procesit”. Përkundrazi, anëtarësimi duhet të katalizojë momentin që Kosova të vazhdojë të bëjë përparim në forcimin e të drejtave të njeriut, demokracisë dhe sundimit të ligjit dhe të adresojë sfidat e hapura dhe çështjet shqetësuese”.

Kërkohet të ndryshohet në: “Anëtarësimi i mundshëm i Kosovës në Këshilli i Evropës do të përfaqësonte kulmin e shkeljeve të rregullave dhe parimeve bazë të së drejtës ndërkombëtare, duke përfshirë, por pa u kufizuar në shkeljet e Kartës së Kombeve të Bashkuara. Anëtarësimi në Këshillin e Evropës do të kuptohej si një mohim i të gjitha atyre parimeve”.

Kujtojmë se sesioni pranveror i Asamblesë Parlamentare të Këshillit të Evropës ka nisur sot (e hënë) dhe do të zgjasë deri më 19 prill.

Në rend dite nesër është kërkesa e Kosovës për pranim në këtë organizatë ndërkombëtare.

Anëtarësimi në Këshillin e Evropës – një synim i Kosovës që nga shpallja e pavarësisë nga Serbia në vitin 2008 – do të nënkuptonte, mes tjerash, përfaqësimin e parlamentarëve të saj në Asamblenë Parlamentare të organizatës.

Kosovarët, po ashtu, do të mund t’i paraqisnin rastet e tyre në Gjykatën Evropiane për të Drejtat e Njeriut.

Vendi do t’i bashkohej edhe Unionit të Transmetuesve Evropianë, duke i hapur rrugë pjesëmarrjes së tij në garën vjetore të këngës, Eurovizion.

Tani, 12 nga 46 shtetet anëtare të Këshillit të Evropës nuk e konsiderojnë Kosovën shtet të pavarur – më pak se pakica bllokuese.

Ato përfshijnë Serbinë dhe Bosnje e Hercegovinën, pesë vendet e BE-së: Qipron, Greqinë, Rumaninë, Sllovakinë dhe Spanjën, si dhe Armeninë, Azerbajxhanin, Gjeorgjinë, Moldavinë dhe Ukrainën./Telegrafi/