Serbët donin ta shuanin familjen Kelmendi: Pas varrimit të Bajram Kelmendit dhe bijve të tij, u gjet bomba në shtëpi

Miku dhe bashkëpunëtori i avokatit Brajam Kemendi, rrëfeu momentin e shkuarjes te varrezat si një mrekulli, për shkak të mërzisë që kishte se po e varrosnin pa u njoftuar askush, e në varreza kishin ardhur një masë e madhe e njerëzve, të afërm e bashkëpunëtorë të familjes.

Ndër të tjera, Ejyp Kolica kujton bisedën me Fehmi Aganin, i cili i kishte thënë se nuk mund të mos merrte pjese në varrimin e bashkëpunëtorit të tij, transmeton Koha.net.

Episod tjetër, sipas tij, ishte gjetja e vendit për varrosje pasi, sipas tij, motra e kishte lutur të ishte një vend më i dukshëm. Vështirësi tjetër Kolica kishte edhe gjetjen e njerëzve që do ta varrosnin, duke kujtuar bisedën me disa fëmijë të cilët e orientuan për te lokacioni i punëtorëve në varreza.

“Ata thanë nuk mund ta lëmë pa e varrosur edhe pse frikësoheshin, pasi mu përballë vendit ku janë varrosur ishin të vendosura forcat e ushtrisë jugosllave në një barakë”, tha ai në “Rubikon” të KTV-së.

Kolica tregoi që pas varrimit, kur janë kthyer në shtëpi, kanë gjetur bombë të paeksploduar nën shkallët e shtëpisë që, sipas tij, kishte qëllim të shkatërronte të gjithë shtëpinë dhe të zhdukte familjen e mbetur: Nekibe Kelmendin, bashkëshorten e Kastriotit dhe dy fëmijët – Elenën dhe Sokolin. Bomba, sipas tij, është larguar pas ndihmës së disa personave.

“Në momentin kur e kanë nxjerrë Bajramin me dy djemtë e tij, një ushtar e ka marrë edhe Sokolin, i është drejtuar eprorit: A ta marrim edhe këtë fëmijë!? Mirëpo, eprori i tha lere atë fëmijë”, thekson ai duke shtuar se qëllimi për këtë dihej, të mos mbetej asnjë mashkull në familjen Kelmendi.

Ai shpjegon se si motra e tij, Nekibja, me pjesën tjetër të familjes është larguar një herë në shtëpinë e Rexhep Bojës, për të vazhduar të nesërmen ne shtëpinë e Orhan Kantarxhiut – shok i Kastriotit.

“Dënim askush nuk ka marrë për vrasjen e Bajramit dhe djemve të tij sepse ende nga ana e forcave serbe nuk është bërë kinse identifikimi i ekzekutuesve apo urdhërdhënësve”, tha Kolica, duke vazhduar së është shumë i bindur se një ditë kjo vrasje e porositur do të zbulohet.