Selmanaj reagon për sondazhin e VV-së: Jemi 8 pikë para vendit të dytë

Përkundër se sondazhi i Vetëvendosjes e renditi LDK-në si parti të parë, deputeti i kësaj partie, Driton Selmanaj po thotë se kanë diferencë më të madhe me vendin e dytë.

Në një postim në rrjetin social Facebook, Selmanaj është shprehur i bindur se LDK-ja do të qeverisë me vendin që nga zgjedhjet e ardhshme.

“Sondazhet për një vit rresht e nxjerrin LDK-në të parën me mbi 30%, me së paku 8 pikë të përqindjes përpara partisë së dytë. Me trendin e rritjes të vitit 2018, LDK-ja shpejt arrin 35% të përkrahjes qytetare. Ky rezultat i mundëson LDK-së të udhëheq me Qeverinë e Kosovës. Dhe për këtë LDK-ja nuk bënë kompromis. Qëndrimi i Kryesisë dhe i Këshillit të Përgjithshëm të LDK-së është i qartë, Qeveria e Kosovës do të udhëhiqet nga kryeministri i LDK-së”, ka shkruar Selmanaj në Facebook.

Lexo po ashtu Rezultatet e anketës së kontraktuar nga VV-ja: Albin Kurti kandidati më i preferuar për kryeministër

Tutje deputeti i LDK-së ka vlerësuar se kjo parti, është zgjidhja e vetme për qytetarët e Kosovës.

“LDK-ja është qartë alternativa më e besueshme për ruajtjen e shtetit dhe tërësisë territoriale të Republikës së Kosovës, për zhvillim ekonomik e social dhe për integrim në BE. LDK-ja nuk bënë kompromis me përgjegjësinë që i japin qytetarët për të udhëhequr me shtetin”, ka thënë Selmanaj.

Në sondazhin e VV-së që është bërë publik të dielën, partia e Isa Mustafës del si e para duke lënë prapa Vetëvendosjen.

Sipas sondazhit e treta renditet PDK-ja, kurse vendin e katërt e zë Aleanca për Ardhmërinë e Kosovës. /Telegrafi/