Sektori privat me ecuri pozitive në Eurozonë

Eurozona e ka nisur vitin 2017 me këmbën e mbarë. Indeksi PMI për rajonin e monedhës së përbashkët europiane fiksohet në 54.3 pikë gjatë janarit, pavarësisht se ka rënë lehtë me vetëm 0.1 pikë në krahasim me dhjetorin. Në muajin e fundit të vitit të kaluar, ky indeks preku nivelin më të lartë në 5 vite.

Të dhënat vijnë në serinë e atyre që tregojnë se, rajoni jo vetëm që ka mbyllur vitin mirë, por do ta ruajë vrullin edhe përgjatë këtij fillim-viti.

Indeksi PMI i markit konfirmon pikërisht këto pritshmëri. Performanca pozitive vjen si pasojë e dobësimit të monedhës së përbashkët që ka nxitur edhe konsumin.
Rritja e çmimeve nga ana tjetër nuk ka nxitur një rënie të kërkesës në sektorin e shërbimeve. Lajme të mira vijnë edhe sa i përket ecurisë së çmimeve të konsumit.

Presionet e inflacionit vazhdojnë edhe përgjatë janarit, duke e vendosur Bankën Qendrore Europiane në pozita të favorshme. Prej katër vitesh, institucioni me bazë në Frankfurt po lufton për të vendosur çmimet brenda objektivit. Indeksi i Markit për janarin sinjalizon një rritje të ekonomisë së bllokut me 0.4% gjatë tremujorit të parë, në rast se do të ruhet vrulli edhe përgjatë muajve shkurt dhe mars.

Indeksi PMI në sektorin e manifakturës është rritur me hapin më të shpejtë që prej prillit të vitit 2011, pavarësisht rritjes së çmimeve, në 55.1 pikë, bindshëm mbi pritshmëritë e tregjeve. Edhe nën-indikatori i bizneseve të reja është rritur lehtë gjatë janarit. /Telegrafi/