Sanksionet nga Perëndimi mbi kompanitë ruse kanë pasur ‘ndikim të madh’ – humbën mbi 100 miliardë dollarë

Sanksionet e vendeve Perëndimore mbi kompanitë ruse kanë pasur një “ndikim të madh”, por mund ta kenë rritur pushtetin e presidentit Vladimir Putin mbi manjatët e vendit.

Kështu thotë kryeekonomisti i BNP Paribas dhe ish-nënkryetari i Departamentit amerikan të Ekonomisë, Daniel Ahn.

Që nga vendosja e sanksioneve në vitin 2014, pas pushtimit të Krimesë nga Rusia, kompanitë ruse kanë humbur 100 miliardë dollarë, një shumë e barasvlershme me rreth 4.2 për qind të ekonomisë së vendit.

Sipas Ahn, përpjekjet e Putinit për të mbrojtur disa nga ato kompani nga sanksionet përmes lehtësimeve tatimore, kontratave shtetërore dhe metodave të tjera rritën ndikimin total të sanksioneve në ekonomi në 8 për qind, një numër që është më i madh se studimet e tjera.

“Pra, 8 për qind nuk është diçka për të teshtirë. Është një numër i madh”, tha Ahn.

Sanksionet nga Perëndimi kundër Kremlinit viteve të fundit janë debatuar ashpër – disa thonë se ato kanë pasur pak ndikim në ekonominë ruse ose në sjelljen e Putinit, duke treguar ndërhyrjen e vazhdueshme të Moskës në Ukrainë, kurse të tjerë argumentojnë se sanksionet e kanë detyruar Putinin të ndërmarrë veprime edhe më agresive që kanë dobësuar mbështetjen e tij të brendshme.

Putini përdori burimet shtetërore për të shmangur ndikimin në kompani të caktuara, veçanërisht ato në sferën e mbrojtjes dhe teknologjisë, duke i bërë manjatët edhe më të varur nga presidenti.

“Duke përdorur aftësinë se kush mund të të mbroj e kush mos të të mbroj, regjimi rus ka forcuar dhe konsoliduar kontrollin e tij mbi sektorët kritikë të ekonomisë”, shton Ahn.

Ai tha se kompanitë ruse që janë të varura nga importet perëndimore për prodhimin e mallrave ose shërbimeve kishin qenë shumë më të ndikuara sesa kompanitë që eksportonin në Perëndim.

“Duke mohuar shërbimet kryesore financiare, ligjore, teknologjike dhe të tjera perëndimore që mund të përbëjnë një sasi relativisht të vogël të vlerës së shtuar, por që në fakt janë kritike për operacionet e një kompanie, ne kemi pasur një ndikim të tepruar në ekonominë ruse”, ai tha.

Ahn tha se ishte i befasuar kur zbuloi se sanksionet amerikane kanë pasur një ndikim më të madh se sanksionet evropiane edhe pse ekonomia e Rusisë është shumë më e varur nga Evropa.

Ai gjithashtu tha se sanksionet evropiane kishin më shumë si synim figurat politike sesa biznesmenët. /REL/