Samsung zotohet të zëvendësojë plastikën në telefonat Galaxy me materiale të ricikluara deri në vitin 2050

Samsung Electronics, prodhuesi më i madh i telefonave inteligjentë në botë për nga dërgesa, u zotua se do të zëvendësojë të gjithë plastikën e përdorur në telefonat e saj inteligjentë Galaxy me materiale të ricikluara deri në vitin 2050, duke theksuar serinë e saj më të fundit Galaxy S, e cila është bërë me numrin më të madh të materialeve të riciklueshmeve deri më sot.

Në të njëjtën kohë, kompania tha se do të përballojë koston e konvertimit të materialeve të ricikluara duke përdorur teknologji të veçanta dhe se nuk do të transferojë barrën e kostos tek konsumatorët, transmeton Telegrafi.

“Samsung Electronics po vazhdon përpjekjet e saj për të minimizuar ndikimet negative në tokë dhe mjedis duke ruajtur cilësinë e produktit”, tha në një konferencë Park Seong-sun, nënkryetar ekzekutiv përgjegjës për zhvillimin e pajisjes në Samsung Mobile Experience.

I lansuar këtë muaj, Galaxy S23 Ultra, smartfoni më i fundit kryesor i Samsung, përmban numrin më të madh të pjesëve të riciklueshme në telefonat Galaxy deri më tani, me një total prej 12 pjesësh, madje duke i përdorur ato në komponentë të jashtëm për herë të parë, tha Park.

Galaxy S22 Ultra i mëparshëm kishte gjithsej gjashtë pjesë të bëra nga materiale të ricikluara, por të gjitha ishin për komponentë të brendshëm. /Telegrafi/