Sa milionerë ka në botë dhe ku jetojnë ata?

Bota ka të paktën 58 milionë milionerë (në dollarë amerikanë), që përbëjnë 1.5 për qind të popullsisë së rritur globale, sipas Raportit të Pasurisë Globale të UBS 2024, i cili mori në mostër 56 tregje që përbëjnë 92 për qind të pasurisë globale.

Kështu, sipas mediave të huaja, përcjell Telegrafi, Shtetet e Bashkuara kanë numrin më të madh të milionerëve, me rreth 21.95 milionë individë që kanë pasuri në shtatë shifra ose më shumë.

Kina vjen në vendin e dytë me rreth 6.01 milionë milionerë, e ndjekur nga Mbretëria e Bashkuar (3.06 milionë), Franca (2.87 milionë) dhe Japonia (2.83 milionë).

UBS e përcakton pasurinë si vlerën e aktiveve financiare dhe aktiveve reale minus borxhet e mbajtura nga një familje.

Pasuria globale (në dollarë) u rrit me 4.2 për qind në vitin 2023 pas një rënie prej 3 për qind në vitin 2022, sipas UBS.

Ndërkohë theksohet se deri në vitin 2028, Britania e Madhe pritet të humbasë shumicën e milionerëve – gati një në gjashtë prej milionerëve të saj do ta humbasë atë status.

Holanda është një tjetër vend që do të humbasë 4 për qind të milionerëve të saj deri në vitin 2028.

Si ndahet pasuria globalisht?

Sipas shkrimit në fjalë, përcjell Telegrafi, pothuajse gjysma e pasurisë së botës, 47.5 për qind ose 213 trilionë dollarë, mbahet nga vetëm 1.5 për qind e popullsisë së rritur globale, sipas Raportit të Pasurisë Globale.

Këto janë familje që mbajnë më shumë se 1 milion dollarë.

Në të kundërt, ata me një pasuri më pak se 10,000 dollarë zotërojnë vetëm 0.5 për qind (2.4 trilionë dollarë) të pasurisë globale, por përbëjnë 39.5 për qind të të rriturve në botë.

Familjet me një pasuri midis 10,000 dhe 100,000 dollarë, që përfaqësojnë 42.7 për qind të të rriturve, përbëjnë 12.6 për qind të pasurisë globale ose 56.2 trilionë dollarë.

Milionerët me rritje më të shpejtë (2000-23)

Për sa i përket pasurisë për të rritur, popullsia e botës ka bërë përparim të konsiderueshëm që nga fillimi i mijëvjeçarit.

Përqindja e të rriturve, pasuria e të cilëve tejkalon 1 milion dollarë u trefishua nga 0.5 për qind në 1.5 për qind.

Që nga viti 2000, Katari pati rritjen më të madhe të numrit të milionerëve, i cili u rrit nga 46 në 26,163.

Kina pati rritjen e dytë më të madhe, nga 39,000 në 6,013,282 milionerë, e ndjekur nga Kazakistani (918 në 44,307).

UBS tha gjatë 15 viteve që ka publikuar raportin e saj, rajoni i Azisë Paqësorit ka shënuar rritjen më të madhe të pasurisë, pothuajse 177 për qind, e ndjekur nga Amerika me gati 146 për qind, ndërsa Evropa, Lindja e Mesme dhe Afrika (EMEA ) u rrit vetëm 44 për qind.

Pjesa më e madhe e milionerëve

SHBA ka 38 për qind të milionerëve të botës, Evropa Perëndimore 28 për qind dhe Kina 10 për qind.

Sipas vendit, në përqindje, Zvicra ka përqindjen më të lartë të milionerëve, me 12 në çdo 100 njerëz që kanë një pasuri prej më shumë se 1 milion dollarë.

Kjo pasohet nga Hong Kongu, ku tetë në çdo 100 njerëz janë milionerë, Australia (shtatë në 100), Holanda (shtatë në 100) dhe SHBA (gjashtë në 100). /Telegrafi/