Rusia po përdor raketa të prodhuara nga Koreja e Veriut në sulmet e saj në Ukrainë – thotë Shtëpia e Bardhë

Rusia po përdor raketa të prodhuara nga Koreja e Veriut në pushtimin e saj në Ukrainë, sipas Shtëpisë së Bardhë.

Zëdhënësi i Këshillit të Sigurisë Kombëtare, John Kirby e bëri këtë pretendim të enjten gjatë një konference për shtyp në Shtëpinë e Bardhë.

“Informacionet tona tregojnë se Republika Popullore Demokratike e Koresë së fundmi i ka ofruar Rusisë lëshues raketash balistike dhe disa raketa balistike”, u tha Kirby gazetarëve në një konferencë në Shtëpinë e Bardhë, shkruajnë mediat e huaja, përcjell Telegrafi.

“Ky është një përshkallëzim i rëndësishëm dhe shqetësues i mbështetjes së DPRK-së për Rusinë”, shtoi ai.

Rusia lëshoi raketa balistike hipersonike në dy qytetet më të mëdha të Ukrainës të martën në mëngjes, duke lënë të paktën pesë persona të vdekur dhe të paktën 130 të plagosur, thanë zyrtarët.

Presidenti ukrainas Volodymyr Zelensky tha në X se katër civilë u vranë pasi raketat hipersonike Kinzhal që mund të fluturojnë me 10 herë shpejtësinë e zërit goditën kryeqytetin e Ukrainës, Kiev dhe qytetin e tij të dytë më të madh, Kharkiv.

Rusia gjithashtu thuhet se po ecën përpara me një marrëveshje për të blerë raketa balistike me rreze të shkurtër veprimi nga Irani. /Telegrafi/