Rrugica e trotuare të dëmtuara, shqetësim i vazhdueshëm për qytetarët e Gjakovës

Qytetarët e Komunës së Gjakovës vazhdojnë që të raportojnë në platformën Ndreqe.com për problemet që ata i shohin si shqetësuese.

Së fundmi në këtë platformë si shqetësim dhe njëkohësisht si problematikë është raportuar dëmtimi i disa rrugicave në hapësirën e parkut të qytetit, hapësirë kjo e cila vazhdimisht është në shfrytëzim të qytetarëve, duke qenë kështu një çështje për të cilën kërkohet ndërhyrje institucionale.

Përveç rrugicave të dëmtuara në këtë lokacion është bërë e ditur se ekziston edhe një pusetë e hapur, e cila mund të paraqesë rrezik eventual për ata që nuk janë në dijeni të kësaj pusete, duke çuar deri në lëndimin e atyre që e frekurntojnë këtë pjesë.

Ndërsa probleme të tjera infrastrukturore paraqiten edhe në Rrugën ‘Anton Çetta’, ku në këtë rrugë shihen dëmtime të dukshme në trotuar, gjë e cila e vështirëson lëvizjen e qytetarëve në këtë pjesë.

Qytetarët po vazhdojnë të raportojnë në platformën Ndreqe.com për ankesat që kanë, ku më pas po intervenohet edhe nga organet përgjegjëse.

Vazhdoni të raportoni edhe më tutje për të gjitha problemet në komunat tuaja përkatëse. /Telegrafi/