Rritja e rasteve me coronavirus, mbyllet vendi prej sot deri të hënën

Një ditë më parë Komiteti për menaxhimin e situatës me COVID-19 ka mbajtur mbledhje, ndërsa për shkak të rritjes së numrit të rasteve me coronavirus është rekomanduar që vendi të mbyllet nga sot, e premte nga ora 20:00 deri të hënën në ora 05:00.

Përjashtim nga mbyllja do të kenë furrat e bukës, barnatoret, institucionet shëndetësore publike dhe private, marketet e vogla, pikat e derivateve.

Më poshtë mund t’i lexoni pikat që janë propozuar nga Komiteti, ndërsa vendimi pritet të merret së shpejti:

1. Ndalohet veprimtaria e te gjitha subjekteve afariste dhe bizneseve, qendrave tregtare e rekreative, supermerketeve, subjekteve që ofrojnë shërbimet e gastronomisë (restorantet, kafenetë dhe të ngjashme) në tërë territorin e Republikës së Kosovës prej orës 20:00 datë: 06/11/2020 (e premte) deri më datë: 09/11/2020 (e hënë) në orën 05:00, përveç:

1.1 Furrave të bukës, barnatoreve, marketeve të vogla, pompave të derivateve.

1.2 Institucioneve shëndetësore publike dhe private për nevoja mjekësore, prodhim, furnizim dhe shitje të mallrave esenciale.

1.3 Për shërbime dhe aktivitete që ndërlidhen me menaxhimin e COVID-19 të (menaxhmenti dhe personeli esencial qeveritar dhe komunal nga këta sektorë – shëndetësi, siguri dhe administratë shtetërore).

1.4 Operatorët ekonomikë dhe transporti i lirë i mallrave/shërbimeve për të siguruar funksionimin e zinxhirit të furnizimit.

2. Pezullohen paragrafët 7, 8, 11, 12, 13, 14, 20 e vendimit të Qeverisë 01/39 të datës 01.11.2020 deri në kohën e përcaktuar sipas dispozitivit 1 të këtij vendimi.

Ndryshe, të enjten është shënuar numri më i madh i rasteve me coronavirus për 24 orë, 661. /Telegrafi/