Rrëzohet helikopteri në Turqi, humbin jetën katër persona

Një helikopter është rrëzuar mëngjesin e sotëm në spitalin Mugla në jugperëndim të Turqisë, ku si pasojë humbën jetën katër anëtarë të personelit të kujdesit shëndetësor.

Ngjarja ndodhi rreth orës 10:00, kur një helikopter i spitalit, që funksiononte nën ombrellën e Ministrisë së Shëndetësisë, u përplas me katin e fundit të godinës së spitalit gjatë ngritjes.

Helikopteri, i cili ishte vendosur në Muğla për detyra zyrtare, nuk mundi të ngrihej një ditë më parë për shkak të kushteve të pafavorshme të motit, transmeton Telegrafi.

Mëngjesin e sotëm, ai tentoi të nisej për në Antalia, por u ndesh me mjegull të dendur pak pas nisjes. Mjegulla e dendur bëri që helikopteri të përplaset me spitalin dhe të rrëzohet në oborr.

Ekipet e reagimit emergjent, duke përfshirë njësitë mjekësore, zjarrfikëse dhe kërkim-shpëtimit, u dërguan në vendngjarje menjëherë pas rrëzimit. Autoritetet zbatuan masa të gjera sigurie ndërsa ekipet filluan operacionet e tyre.

Në një deklaratë, Ministria e Shëndetësisë ka konfirmuar humbjen e katër punonjësve në tragjedi. Ndër viktimat ishin dy pilotë, një mjek dhe një punonjës i kujdesit shëndetësor.

Muğla’da Eğitim ve Araştırma Hastanesi’ne çarpan helikopter boş alana düştü; olay yerine itfaiye, sağlık, polis ve AFAD ekipleri sevk edildi https://t.co/6G2rRIrGSK pic.twitter.com/56mo00LZq8

— Anadolu Ajansı (@anadoluajansi) December 22, 2024

Muğla, e vendosur në jugperëndim të Turqisë, është e njohur për peizazhet e saj piktoreske dhe qytetet bregdetare, duke e bërë incidentin edhe më tronditës për komunitetin lokal.

Një hetim zyrtar për shkaqet e rrëzimit ka nisur, ndërsa autoritetet po punojnë për zbardhjen e rrethanave të ngjarjes. /Telegrafi/