Rreth 2500 emigrantë nga Shqipëria punojnë në Gostivar

Sipas të dhënave të policisë, brenda një viti në regjionin e gjerë të Gostivarit rreth 2500 emigrantë nga Shqipëria fqinje vijnë për punë sezonale, kryesisht në ndërtimtari dhe bujqësi. Sipas ekonomistëve, këto shifra nxjerrin në sipërfaqe faktin se në regjionin e Gostivarit ekziston nevoja për krah pune, por gjithsesi që për t’u angazhuar në punë nevojitet vullneti dhe dëshira, shkruan gazeta Koha.

“Nëse këto shifra janë të sakta dhe ne nuk kemi se përse të dyshojmë, del në sipërfaqe realiteti që punë ka, por duhet të ketë edhe punëtorë. Mëditja për punë krahu sillen nga 20 deri 25 euro. Muajt që mund të shfrytëzohen për punë krahu llogariten marsi, prilli, maj, qershori, korriku, gushti dhe shtatori. Do të thotë 7 muaj apo rreth 210 ditë si mundësi potenciale për angazhim në punë. Nëse marrim një mesatare, fitimi për një person llogaritet diku nga 4.000 deri 6.000 euro. Tani duhet të llogaritet edhe periudha apo ditët kur nuk ka angazhime në punë, vlera e mëditjes si dhe shpenzimet që bëhet për vendqëndrim dhe ushqime. Nga një total i llogaritur i fitimit, bie që diku 1 milion euro mblidhen nga puna e emigrantëve brenda një viti në regjionin e Gostivarit, përfshi edhe Komunat Vrapçisht dhe Mavrovë-Rostushë”, shprehet për KOHA, ekonomisti Lavrdim Jashari, i cili thotë se emigrantët janë të pranuar mirë nga popullata vendase dhe shpenzimet e qëndrimit janë minimale.

Angazhimi i tyre fokusohet kryesisht në punë ndërtimore. Viteve të fundit, grupet e ndërtimit kryesisht përbëhen nga emigrantë të Shqipërisë. Pronari i një firme ndërtimore nga Gostivari, tregon që nga 12 punonjës që ka aktualisht, vetëm dy janë të vendit kurse të tjerët janë nga Shqipëria.

“Realisht kemi mungesë të krahut punëtor nga vendi. Nuk kanë interesim. Detyrohemi të angazhojmë punonjës nga Shqipëria. Shumica e tyre e njohin punën dhe kalojmë mirë. Më herët i angazhonim vetëm në ditë të caktuara kur bënim betonimin e tavaneve dhe ku kishim më tepër nevojë për fuqi punëtore. Të jem i sinqertë, edhe mëditjet ishin më të ulëta për punonjësit nga Shqipëria. I dallonim nga punëtorët e vendit. Tani kemi situatë tjetër. Betonimi bëhet përmes pompave dhe nuk kemi shumë angazhim të krahut të punës. Por dallon nga vitet e kaluara sepse tani kemi më pak punëtorë të vendit. Tash mëditja nuk dallon dhe rrotullohet nga 20 deri 25 euro dhe kryesisht i kemi punonjës nga Shqipëria”, thotë pronari i ndërmarrjes.

Një pjesë e konsiderueshme e tyre, angazhohen në çdo periudhë të vitit. Disa nga ato janë të angazhuar nëpër fshatra si bari dhensh dhe qëndrojnë edhe në periudhën e dimrit. Ka dhe të tillë që punojnë në punë të tjera që nuk lidhen me punët sezonale të verës. Dhe derisa rreth 2.500 punonjës nga Shqipëria po gjejnë punë në rajonin e Gostivarit, me fillimit e vitit në Qendrën për Punësim u evidentuan 6197 në listën aktive që kërkojnë punë.