Rrëfimi për Bajram Kelmendin dhe aktakuzat kundër Millosheviqit

17 vjet pas vrasjes së avokatit Bajram Kelmendit me të bijtë e tij, Kastriotin dhe Kushtrimin, bashkëpunëtori i Kelmendit, njëherësh miku i tij, vëllai i Nekibes, Ejyp Kolica, ka folur në Rubikon të KTV-së për të pathënat e kidnapimit, vrasjes dhe varrosjes së tyre.

“Për fat timin, përveç që e kam pasur dhëndër, pata fatin të jem edhe bashkëpunëtor i tij profesional në vitet e vlugut të aktivitetit të tij për çështje familjare, në vitet 1991- 1995”, filloi rrëfimin për Bajram Kelmendin dhe dy djemtë e tij, me detaje të panjohura më herët, transmeton Koha.net.

Përpilimin e dy aktakuzave kundër Sllobodan Millosheviqit për krimet dhe gjenocidin serb, aktivitetin rreth këshillit për Mbrojtjen e të Drejtave dhe Lirive të Njeriut, e procesin e minatorëve, Kolica i përmend duke thënë se këto ishin produkt i kohës kur ai kishte kulmin e aktivitetit.

“Aktakuza e parë e përpiluar ndaj Millosheviqit ka qenë fryt dhe angazhim i Bajram Kelmendit. Kjo është përgatitur në vitin 1992 dhe në kohën kur ai e ka përgatitur e ka ditur veç Nekibja, unë e Kosovarja. Askush tjetër. Aq më tepër, kur e ka përgatitur aktakuzën, unë është dashur ta luaj rolin e mirëmbajtësit të pastërtisë, para zyrës së tij, ta marr gypin e ujit dhe ta ujis sipërfaqen para zyrës në mënyrë që të detektoj mos po vjen dikush nga forcat e Policisë serbe apo dikush tjetër ta vërejë, ta zë Bajramin duke punuar”, ka thënë Kolica, për të vazhduar me iniciativën për aktakuzën e dytë, ku sipas tij, për përpilimin e saj Kelmendi kishte bashkëpunuar me avokatët tjerë, si Fazli Bala, Adem Bajri e Ymer Osa.

Bashkëpunëtori më i ngushtë i Bajram Kelmendit, gjatë intervistës, shpalosi të gjitha detajet deri tani të padëgjuara se si ndodhi eliminimi i tre burrave të familjes Kelmendi dhe si i gjeti ata, proces për të cilin Kolica thotë së ishte padyshim hakmarrje ndaj tyre.

Kolica tregoi më tej se si ishte gëzuar Kastrioti, djali i Bajram Kelmendit, për natën e bombardimeve të NATO-s mbi caqet serbe.

“Në orën 22:30, më është lajmëruar Kastrioti, e më thotë ‘o dajë u tranova prej gëzimit, u çmenda, po luj në majë të gishtave prej gëzimit’. Kishte dalë në tarracën e madhe të shtëpisë me telefon në dorë e zhvilloi këtë bisedë”, rrëfen Kolica për bisedën e fundit që zhvilloi me nipin e tij, Kastriotin.

Kolica përmendi detaje nga data e bombardimit, prej momentit që ka filluar rrethimi dhe monitorimi i tërë rrugës ku ishte shtëpia e Bajram Kelmendit.

“’Unë i gjallë Kosovën nuk do ta lë’, kishte thënë Bajram Kelmendi, kur filluan vrasjet e të rinjve kosovarë nga forcat ushtarake serbe”, tha Kolica, duke shpjeguar arsyen pse Kelmendi nuk e kishte lëshuar asnjëherë Kosovën.