Rohde hedh kritika ndaj opozitës për bllokimin e miratimit të marrëveshjeve ndërkombëtare, e përjshaton LDK-në

E plotësuar: Ambasadori Rohde, ka korrigjuar shkrimin e statusit në Twitter, tani me emër të ndryshuar “X”, pasi përfshiu gjithë opozitën parlamentare, si fajtore dhe pengesë për mosmiratimin e marrëveshjeve ndërkombëtare në Kuvend.

Rohde sqaroi se, rrjeti social “X”, nuk ia mundësoi me karaktere të tregojë që LDK-ja nuk është pjesë e këtyre pengesave.

“Oops. Rrjeti social X, aq karaktere më lejoi. Por LDK nuk është pjesë e sjelljeve penguese të opozitës që përmenda”, shkroi Rode.

Ambasadori i Gjermanisë në Kosovë, Jorn Rohde ka shprehur shqetësimin e tij lidhur me mosmiratimin e marrëveshjeve ndërkombëtare.

Në një postim në platformën “X”, Rohde ka shkruar se me mosmiratimin e tyre po vihen në rrezik projekte të mëdha energjetike e bujqësore.

“Të shqetësuar për mosmiratimin e vazhdueshëm të marrëveshjeve ndërkombëtare në Kuvend që mund të sjellin miliona përfitime për qytetarët e Kosovës. Janë në rrezik projekte të mëdha energjetike dhe bujqësore mes Gjermanisë dhe Kosovës. Duhet një qasje konstruktive nga të gjithë akterët, opozita duhet t’i japë fund bllokadës”, ka shkruar Rohde.

Lexo po ashtu Opozita nuk u jep mbështetje marrëveshjeve ndërkombëtare, Konjufca nuk i hedh fare në votim

Kujtojmë se javë më parë ka dështuar miratimi i marrëveshjeve ndërkombëtare për shkak të mungesës së kuorumit.

Marrëveshjet e ndërkombëtare të paraparë që të votoheshin në këtë seancë ishin: Votimi i Projektligjit për ratifikimin e Marrëveshjes së financimit në mes të Republikës së Kosovës, përfaqësuar nga Ministria e Financave, Punës dhe Transfereve dhe Bankës Evropiane për Investime për projektin “Rehabilitimi i linjës hekurudhore 10 B”.

Shqyrtimi i Projektligjit për ratifikimin e Marrëveshjes në mes Republikës së Kosovës, e përfaqësuar nga Ministria e Bujqësisë, Pylltarisë dhe Zhvillimit Rural dhe Deutsche Gesellschaft für Zusammenarbeit (GIZ) GmbH, për projektin mbështetja për zhvillimin e qëndrueshëm të sektorit të bujqësisë në zonat rurale përmes diversifikimit të aktiviteteve./Telegrafi/

Concerned by the ongoing non-adoption of intl agreements in the Assembly that could bring millions in benefits for 🇽🇰citizens. Bilaterally alone, huge 🇩🇪-🇽🇰energy & agriculture projects are at stake. Constructive approach by all stakeholders needed, opposition should end blockade

— Ambassador Jörn Rohde (@GermanAmbKOS) October 23, 2023