Rexhep Selimi falënderon Metën që nuk e dekretoi Cakajn, thotë se s’do të duhej të dekretohej as Besa Shahini

Deputeti i Lëvizjes Vetëvendosje, Rexhep Selimi e ka cilësuar vendim të duhur mos-dekretimin e Gent Cakajt, si ministër të Jashtëm në Shqipëri.

Nëpërmjet një postimi në rrjetin social Facebook ai ka falënderuar presidentin shqiptar për këtë vendim.

Madje deputeti i VV-së ka thënë se edhe ministrja e Arsimit që u dekretua nga Meta, do të duhej të refuzohej.

“E përgëzoj Presidentin shqiptar Ilir Meta për mos dekretimin e kandidatit për Ministër të Punëve të Jashtme të Republikës së Shqipërisë. Presidenti do të duhej ta refuzonte edhe të emëruarën për Ministre të Arsimit. Jo sepse ata janë nga Kosova, përkundrazi, por për arsyen se Kosova ka figura të shquara me dinjitet që do ta vazhdonin traditën e ministrave nga Kosova në Qeverinë shqiptare që nga Hasan Prishtina e këtej”, ka shkruar Selimi në facebook.

Ai e ka quajtur Besa Shahinin “mbesë të spiunit të UDB-së, Ibush Kllokoqi”.

“A nuk gjeti Rama person më të mirë se sa mbesën e spiunit të UDB-së Ibush Kllokoqit për Ministre të Arsimit?  Sa mirë që nuk është më Rrahman Morina, se ku i dihet, ndoshta do t’iu kishte rekomanduar Ramës nga e njëjta dorë”, shkroi tutje deputeti i VV-së.

Madje Selimi propozoi që për ministër do të ishte “patrioti dhe intelektuali, Murat Jashari”. /Telegrafi/