Reshitaj: Shkatërrimin e deponive ilegale do ta fillojmë me Suharekën

Ministrja e Mjedisit dhe Planifikimit Hapësinor, Albena Reshitaj, në emisionin “Zyra e Ankesave” në RTV “Dukagjini” ka folur për aksionin e pastrimit, grumbullimin e mbeturinave si dhe shkatërrimin e deponive ilegale në Kosovë.

Reshitaj tha se aksionin e kanë filluar me Komunën e Mitrovicës, për të vazhduar me Komunën e Suharekës.

Ajo theksoi se në Suharekë do të organizohen një sërë kampanjash dhe aktivitetesh që do të rrisin vetëdijesimin e qytetarëve për mbajtjen pastër të ambientit ku jetojmë.

“Ne do të fillojmë në Komunën e Suharekës, për shkatërrimin e deponive. Kryetari ka vendosur që ky projekt të filloj në ditën e tokës dhe do të organizohen një sërë aktivitetesh kampanjash, si dhe do të rrisim vetëdijesimin e qytetarëve për mbajtjen pastër të ambientit ku jetojnë. Në këtë komunë aktivitetet fillojnë nga ora 9:00. Do të filloj aksioni i madh me largimin e mbeturinave në Suharekë. Këtij aktiviteti i janë bashkuar shumë nxënës, policë, punonjës shëndetësor, shoqëri civile etj. Kemi filluar me komunën e Mitrovicës, tani është komuna e Suharekës dhe do të vazhdojmë me komunat tjera. Kësaj radhe i kemi mbledh forcat për pastrimin e vendit tonë”, ka thënë ministrja Reshitaj.
Po ashtu ajo tregoi se do të fillojnë me ndërtimin e disa impianteve për menaxhim të mbeturinave.

“Përpos që po bëjmë shkatërrimin e deponive ilegale ne po punojmë se si t’i shndërrojmë ato mbeturina për të mirë të vendit. Duhet t’i trajtojmë dhe t’i menaxhojmë deponitë ilegale. Duhet t’i shndërrojmë në benefite këto mbeturina”, tha ministrja Albena Reshitaj. /Telegrafi/