Relaksim me muzikë ritmike

Ushtrimet, para së gjithash, i bëjnë mirë formësimit të belit, muskujve të kofshëve dhe muskujve të shpinës.

Merita Humolli
IFA Personal Trainer
045 27 57 57
Fitness Gym Prishtina

Gjimnastika ritmike dallohet për shumëçka nga ushtrimet klasike, ndërkaq njëra ndër specifikat është edhe ajo që vetë mund të përcaktoni ritmin dhe shpejtësinë e ushtrimeve, në harmoni me muzikën të cilën dëshironi ta dëgjoni. Pasi që t’i dëgjoni taktet e para të muzikës suaj të dashur, ju duhet vetëm të merri peshqirin dhe t’i dorëzoheni melodisë.

Në gjimnastikën ritmike është me rëndësi që lëvizjet tuaja t’i harmonizoni me muzikën ritmike, që do të thotë këto ushtrime kërkojnë përqendrim të lartë, mirëpo njëkohësisht janë edhe të shkëlqyeshme për relaksim pas një dite të mundimshme.

Femrat që ushtrojnë me muzikë ritmike janë të njohura për nga lëvizjet elegante, ndërkaq ushtrimet e tyre, para së gjithash, i bëjnë mirë formësimit të trupit, të muskujve të kofshëve dhe të shpinës.

Gjimnastika ritmike zhvillon lëvizshmërinë, koordinimin e lëvizjeve, muzikalitetin dhe shpirtin krijues. Ushtrimet mund të bëhen me rekuizita si p.sh. topi, koni, ndërkaq ne ju propozojmë pesë ushtrime ritmike me rreth.

1. Merreni rrethin, hyni në të dhe filloni ta rrotulloni përreth belit. Ky është një ushtrim i shkëlqyeshëm për ngrohje dhe ndihmon në formësimin e belit.

2. Uluni galiç në dysheme dhe me duar rrotulloni rrethin nëpër dysheme. Ky ushtrim është i mirë për çlirim të boshtit kurrizor.

3. Mbështetuni në dysheme me njërin gju, ndërkaq këmbën tjetër shtrijeni anash. Me rreth në duar bëni largimin në drejtim të këmbës e cila është e shtrirë. Pastaj rrotullojeni pozitën e këmbës dhe të tërën përsëriteni. Me këtë ushtrim do t’i tendosni muskujt anësorë dhe do të formësoni belin.

4. Qëndroni në njërën këmbë, ndërkaq tjetrën shtrijeni prapa, sa të mundeni. Me dorë mbani rrethin e mbështetur në dysheme dhe silleni me gishtërinj derisa jeni duke qëndruar në këtë pozitë. Në këtë mënyrë i tendosni muskujt e kofshëve.

5. Qëndroni vertikalisht dhe vëreni rrethin pas dorës. Bëni lëvizje nga ana e majtë në drejtim të anës së djathtë, mirëpo në atë mënyrë që të lëvizni vetëm pjesën e sipërme të trupit, derisa kofshët duhet të jenë statike. Ky ushtrim i bën mirë formësimit të muskujve të shpinës. /Telegrafi/