Trajneri i Prishtinës, Zekirija Ramadani ndihet i lumtur me fitoren e ekipit të tij në shtëpi ndaj Drenicës me rezultat 3-1 në kuadër të javës së parë të stinorit pranveror.
Prishtina ka vazhduar formën e mirë duke arritur edhe fitoren e tretë në tri ndeshje zyrtare në vitin 2021, duke mposhtur Drenicën pas fitoreve ndaj Dritës në Superkupë dhe Kupë.
Golat në këtë ndeshje u shënuan nga Alban Shillova, Leonit Abazi dhe Gentian Muca për vendasit, ndërsa për Drenicën shënoi Denilsson.
Pas fitores ka folur edhe trajneri i Prishtinës, Ramadani, i cili ka thënë se ndihet i lumtur me fitoren, ndërsa ka përgëzuar lojtarët e dy ekipeve për paraqitjen sot.
“Sot duhet të jemi të kënaqur me këtë fitore. Uroj futbollistët e mi dhe ata të Drenicës për angazhimin dhe lojën që shfaqën në këto temperature të ulëta”, ka thënë fillimisht Ramadani pas ndeshjes.
“Falënderoj skuadrën për luftën që bëri në fushë. Nuk ishte e lehtë, sepse tradita e ndeshjeve me Drenicën tregon që nuk ka takim të lehtë”.
“Goli i barazimit nga ana e tyre na mobilizoi në pjesën e dytë, të cilën e fituam me meritë dhe arritëm objektivin që kishim për këtë ndeshje”, përfundoi trajneri i Prishtinës. /Telegrafi/
