Analisti politik, Sadri Ramabaja, ka komentuar situatën pas dështimit të seancës për zgjedhjen e Qeverisë së re, duke thënë se racionaliteti në politikën kosovare “ka migruar dhe është arratisur kaherë”.
Në një prononcim në emisionin Debat Plus, Ramabaja theksoi se marrëveshja mes Lëvizjes Vetëvendosje dhe disa deputetëve të Lidhjes Demokratike të Kosovës nuk është realizuar, duke theksuar se politikanët janë fokusuar më shumë në interesat partiake sesa në ato të qytetarëve.
“Nga politika kosovare racionaliteti ka migruar, është arratisur kaherë. Prisja, pasi kisha informacione se kishte pasur bisedime me disa deputetë të LDK-së, që megjithatë do të arrihej një marrëveshje, sidomos nga ata që shpesh thirren në interesin e shtetit dhe qytetarëve. Por, nëse do t’u kishin besuar institucioneve përgjegjëse të LDK-së, ata nuk do të kishin biseduar. Atyre u ka interesuar mbi të gjitha interesi i Republikës,” tha ai.
Ramabaja theksoi se përgjegjësinë për situatën e krijuar e mbajnë të gjitha palët, por veçoi opozitën si më përgjegjëse për zvarritjen e procesit politik.
“Përgjegjësinë e kanë të gjithë, por mbi të gjitha e ka opozita që na ka zvarritur për një kohë të gjatë. Edhe Kurti ka përgjegjësi, pasi ka pasur mundësi që disa çështje që lidhen me votimin e kryeparlamentarit të zgjidheshin më herët,” shtoi Ramabaja.
