Rama: Ta përdorësh uniformën e mjekut për të nxjerrë para, krim kundër njerëzimit

Kryeministri i Shqipërisë Edi Rama deklaroi sot se, ta përdorësh uniformën e mjekut për të nxjerrë para me gjakun e të sëmurëve është krim kundër të gjithë njerëzimit.

Në një takim me drejtuesit e shërbimeve në Qendrën Spitalore Universitare “Nënë Tereza”, Rama pas ngjarjes tek Onkologjiku, Rama e cilësoi atë moment shumë të errët që krijoi për të gjithë komunitetin e bluzave të bardha dalja në dritë e veprimtarisë kriminale e disa individëve.

Ai iu referua fjalëve të njërit prej heronjve të shëndetësisë shqiptare, profesor Besim Elezit, ditën e hapjes së spitalit ultramodern të sëmundjeve të Brendshme: “As në ëndërr nuk e kishim parë dot një spital me këto kushte dhe ky spital nuk ka asgjë më pak se sa spitalet më të mirë të Evropës”.

“Besim Elezi dhe si vëllezërit e gjeneratës së tij i dhanë jetë një shëndetësie heroike në kushtet më minimale, në një spital që s’kishte më shumë sesa pastërtinë dhe mjete te spitalit të mesjetës në Francë apo gjetkë në ato pak qendra të zhvilluara të Evropës së asokohe”, u shpreh Rama.

Kryeministri vuri në dukje se në spitale mungonte pothuajse gjithçka nga çfarë kemi sot, por nuk mungonte figura dhe përkushtimi i mjekut.

Ndërsa sot, vijoi ai, nuk mungon thuajse asgjë nga çfarë nuk kishim dje, por fatkeqësisht jo gjithnjë figura dhe përkushtimi i mjekut janë në lartësinë e misionit që nis me betimin e Hipokratit.

“Të mos jesh në lartësinë e detyrës në shumë profesione të tjera është problem jo i vogël, por të mos jesh në lartësinë e detyrës në profesionin tuaj është më shumë se një problem i madh, është një hall shumë i madh për njeriun kur me mjekun lidhet fati i shëndetit të tij”, tha Rama.

“Por të kesh marrë diplomën dhe licencën e ushtrimit të këtij profesioni dhe ta përdorësh uniformën më simbolike dhe më delikate të shoqërisë dhe të shtetit njësoj si maskat e grabitqarëve të bankave për të nxjerrë para’ me gjakun dhe me ilaçet e të sëmurëve është krim, jo thjesht kundër tyre, por kundër të gjithë njerëzimit”.

“Jam këtu sot për të thënë që veprimtaria kriminale e atij grupi keqbërësish, njësoj si Tixhja, nuk e hedh dot poshtë përpjekjen tonë për ta shndërruar sistemin shëndetësor nga ngrehina ku e gjetëm në një sistem shërbimesh funksionale. Madje, kjo që ndodh na bën më të vetëdijshëm për gjërat që duhen bërë akoma”, tha Rama.

“Do të angazhojmë një grup menaxherësh të huaj për të asistuar drejtuesit e QSUT që të garantojmë sa më mirë edhe hapjen së shpejti të kapitullit të autonomisë spitalore që kjo qendër do duhet ta ketë dhe që kësaj qendre t’i japë fleksibilitetin për të shpërblyer profesionistët e vet sipas meritës, jo më me ato tavanet e njëjta”, shtoi Rama. /Telegrafi/