Rama e Tahiri: Opozita, armik më i madh se krimi për policinë

Në hyrje të godinën së Ministrisë së Brendshme në Shqipëri, që iu nënshtrua rikonstruktimit total, me një vlerë 405 milionë lekësh, është ndërtuar “Muri i Kujtesës”, në kujtim të 264 policëve të rënë në krye të detyrës.

Ylli i fundit i takon Ardian Kodrës, punonjësi i FNSH – së së Shkodrës, që u vra gjatë përplasjes me një të sëmurë mendor, në Torovicë dhe u vendos nga Kryeministri dhe djemtë e të ndjerit.

Në fjalën e mbajtur, në një event të organizuar për inagurimin e godinës, Ministri i Brendshëm Saimir Tahiri dhe Kryeministri Edi Rama, më tepër se investimin e qeverisë, folën për sulmet e opozitës ndaj Policisë së Shtetit, që sipas tyre, e bëjnë Partinë Demokratike një armik edhe më të madh për uniformat blu dhe se vetë krimin.

Kryeministri foli shumë gjatë edhe për reformat që qeveria ka ndërmarrë në këto 3 vite, në të gjithë sektorët, që nga energjitika e deri tek policia dhe premtoi rritje të pagave për punonjësit e policisë, sipas kërkesës së Ministrit Tahiri.

Godina e rikonstruktuar e Ministrisë së Brendshme ka një pamje të re. Ngjyra e fasadës është në kontrast me godinat e ministrive të tjera në bulevardin “Dëshmorët e Kombit”. Restauruesit kanë zbuluar se kjo ishte boja e përdorur nga projektuesit e godinave, kur ato u ndërtuan rreth viteve 1930 dhe kanë vendosur ta rikthejnë fasadën e identitet, për të vazhduar më tej me ndërtesat e tjera./Klan/