Qytetari nga Kamenica ankohet për gropë në rrugë – komuna thotë se rregullimi varet nga kompania kontraktuese

Një qytetar nga Komuna e Kamenicës ka ngritur shqetësimin për një gropë në një lagje të qytetit, duke kërkuar nga autoritetet lokale të merren me këtë problem.

Përmes platformës ndreqe.com, ai ka publikuar pamje të gjendjes së dëmtuar të rrugës dhe ka theksuar se gropa po pengon komunikacionin dhe po dëmton veturat.

“Ju lutemi komunës që ta mbyllin gropën në rrugë pasi që po pengon shumë komunikacionin rrugorë, ku gjthashtu po i dëmton edhe veturat”, ka shkruar ai.

Florentina Kryeziu, udhëheqëse e Sektorit për Siguri dhe Emergjenca në Komunën e Kamenicës, ka thënë për Telegrafin se ankesat për gropa nuk do të rregullohen deri në muajin mars.

“Nuk do të rregullohen deri në muajin mars, megjithëse kjo varet nga kompania kontraktuese”, ka thënë Kryeziu.

Ndryshe, platforma ndreqe.com mbetet një adresë e rëndësishme për qytetarët që dëshirojnë të ngrenë ankesa dhe të raportojnë probleme të tilla si gropat në rrugë, duke ofruar mundësinë për t’u lidhur me autoritetet lokale për ndihmë dhe reagim. /Telegrafi/