Qytetarët vazhdojnë të ankohen për kushtet në Kodrën e Diellit

Ndonëse jemi në muajin janar në Kodrën e diellit ende nuk ka borë. Mirëpo kjo nuk pengon që qytetarët të vijnë këtu, sidomos në ditë festash. Ata nuk ankohen për borën por për kushtet e tjera të cilat thonë se mungojnë në këtë pikë turistike. Gjashtë vjet u premtua një skilift me gjashtë ulëse, nuk ka parkingje, as ndriçim sa duhet gjatë natës.

“Problemet e qytetarëve që vijnë për ta vizituar Kodrën e Diellit fillojnë që 3km para se të arrijnë atje. Kjo pasi që mungon parking dhe krijohen kolona të gjata të makinave”, Almedina Ismajli, gazetare.

“Si çdo vit tjetër kushtet nuk janë të mira, risi këtë vit është gjashtëulsja që është instaluar por ende nuk është në funksion. Është problem puna e parkimit, por jemi mësuar me këtë problem”, theksoi një instruktor skijimi.

Mes qytetarëve takuam edhe ministrin e Kulturës, Hysni Ismaili, i cili kishte ardhur për rekreacion, ai shpreson se kushtet në Shapkë do të rregullohen.

“Ka deri diku, po plotësisht nuk janë kushtet e mira, shpresoj se në të ardhmen do të kemi kushte të mirëfillta”, u shpreh Hysni Ismaili, ministër i Kulturës.

Sipas të punësuarve, ka mungesë turistësh këtë vit, e kjo sipas tyre për shkak të skilifteve.

Edhe nga iniciativa “Ta shpëtojmë Kodrën e Diellit” ka ankesa të shumta. Ata thonë se edhe natyra po i dënon me mungesë të borës.

“Shifet një dëshpërim atje lartë, nuk ka turistë të mjaftueshëm, qendra e shijimit ende nuk funksionon sepse edhe Zoti ka heqë dorë nga ne nuk kemi edhe borë natyrale, përveç kësaj 500 mijë euro për borën artificiale që u harxhuan nuk e kemi as atë. Duhet të adresojmë dhe kontrollojmë se ku u harxhuan ato fonde. Që 6 vite po ndërtohet skilifti në Kodrën e Diellit dhe ende është i papërfunduar”, tha Hamdi Sulejmani nga iniciativa “Ta Shpëtojmë Kodrën e Diellit.

Edhe pse ministri i Ekonomisë Kreshnik Bekteshi disa herë u lavdërua për lëshimin në përdorim dhe rregullimin e gjashtëulëses, ajo ende nuk është në funksion. Tani nga Ministria e Ekonomisë na thonë se për këtë çështje duhet të pyesim ELEM-Tursin. Ndërkaq nga Elem – Turs nuk na kthyen përgjigje, se përse nuk është në funksion gjashtëulësja.

Me kalimin e viteve problemet në Kodrën e Diellit janë grumbulluar njëri pas tjetrit, ndërsa deri më tani nuk është gjetur asnjë zgjidhje afatgjatë, përveç rrugës që u asfaltua vitin e kaluar që të çon në Kodrën e Diellit.

Ndryshe “ELEM-Turs” menaxhon me disa kapacitete turistike, mes tyre edhe me Kodrën e Diellit si filiali më i madh që ka nën kompetenca./Tv21/