Qumështarët kërkojnë nga Prokuroria hetimin e vendimit për masat mbrojtëse

Ende pa u bërë një muaj nga fillimi i aplikimit të masës mbrojtëse për qumështin e importuar nga Bosnja dhe Hercegovina, ajo u shfuqizua në mbledhjen e Qeverisë së Kosovës këtë të martë.

Kjo, po konsiderohet një goditje e rëndë në përpjekjet e qumështarëve për të mbijetuar dhe për t’u zhvilluar.

“Me këtë vendim, Qeveria nuk priti t’i shoh rezultatet pozitive për prodhuesit vendorë që do të mund vinin si pasojë e aplikimit të masave mbrojtëse. Vetëm pas tri ditëve të para kur filloi aplikimi i masave mbrojtëse, përfitimi për buxhetin e shtetit ishte mjaft i madh, me rreth 252000 euro të inkasuara”, thuhet në reagimin e Shoqatës së Fermerëve Kosovarë të Qumështit, dërguar mediave sot.

Tutje thuhet se qumështarët e kanë shumë të vështirë që të gjejnë më arsye brenda logjikës së shëndoshë se pse është marrë një vendim i tillë.

“Aq më tepër ku sipas raportimeve, ky shfuqizim as që është debatuar e argumentuar në këtë mbledhje. Kur nuk ka një arsyetim ose debat rreth një çështje kaq të rëndësishme, atëherë dyshimet tona rriten edhe më tej për arsyet prapa këtij vendimi. Në këto rrethana, ne themi se Qeveria e Kosovës është fajtori kryesor për shkatërrimin e sektorit të qumështit në vend. Ne duam t’ia kujtojmë edhe njëherë qeverisë sonë se Bosnja dhe Hercegovina nuk e njeh Kosovën si shtet, dhe se prodhuesit tanë hasin në dhjetëra pengesa kur tentojnë të eksportojnë në këtë shtet. Në fakt, një gjë e tillë shpesh herë është e pamundur”, thuhet në reagim.

Sipas tyre nuk mund të ketë një arsyetim të mendësisë ekonomike të bazuar në frikën për masa reciproke të supozuara. Si dhe nuk mund të ketë masa reciproke import-eksport me një shtet që nuk të njeh dhe nuk ta lejon eksportin.

“Ne kërkojmë nga Porkuroria e Shtetit që ta hetojë këtë vendim të Qeverisë së Kosovës, meqë ne dyshojmë se vendimi është marrë si pasojë e presioneve dhe korrupsionit. Ne i ftojmë të gjithë qumështarët, qofshin ata fermerë, pikat grumbulluese apo përpunues të qumështit, që të reflektojnë rreth trajtimit që është duke na bërë qeveria dhe të mendojmë për bashkimin e forcave rreth krijimit të një Strategjia Kombëtare për sektorin e qumështit”, thuhet në reagimin e qumështarëve të Kosovës, përcjell Telegrafi.